د چین د دولت رئیس مرستیال هان جنګ او د پاکستان صدراعظم شهباز شریف د مې په ۲۵مې نېټې په پلازمېنې بېجینګ کې د چین او پاکستان د ډیپلوماتیکو اړیکو د ټينګېدو د ۷۵مې کلیزې د لمانځلو په مېلمستیا کې ګډون او ويناوې کړې دي.
هان جنګ يادې مېلمستيا ته په وينا کې ویلي، چې نړۍ د چټکو بدلونونو په حال کې ده او وضعیت يې پیچلی او بې ثباته دی. چین به له پاکستان سره د دواړو هېوادونو د مشرانو مهمه اجماع جدي پلې کړي او د دواړو هېوادونو د ډیپلوماتیکو اړیکو د ۷۵مې کلیزې په درشل کې به دودیزې دوستۍ، د ستراتیژیکو اړیکو پیاوړتیا، د عملي همکارۍ ژورولو او د عصريتوب بهیر ته دوام ورکړي او په ګډه به پرمختګ ومومي.
نوموړي ويلي، که چين او پاکستان په يادو برخو کې فعالې هڅې وکړي، نو دا به په نوې زمانه کې د دواړو هېوادونو د ګډ برخلیک ټولنې د جوړولو کار ګړندی کړي، خپلو خلکو ته به زیاتې ګټې ورسوي او د سیمه ییزې سولې، ثبات او سوکالۍ لپاره به خدمتونه برابر کړي.
شهباز شریف يادې مېلمستيا ته په وينا کې ويلي، چې د پاکستان او چین ترمنځ دوستي نه ماتېدونکې او بې ساري لوړې کچې ته رسېدلې ده.
نوموړي ويلي، د رئیس شي جین پینګ ۴ نوښتونو د نړیوالې سولې او پرمختګ لپاره د پام وړ خدمت کړی او په سوله او پرمختګ کې يې يې فعالې ونډې اخیستې دي.
شریف د چینایانو د نه ستړې کېدونکوهڅو پر مټ د لویو پرمختیایي لاسته راوړنو ستاینه کړې او ويلي يې دي، چې هېواد به یې د خپل پرمختګ لپاره د چین له تجربو څخه زده کړه وکړي او د پاکستان او چین ترمنځ دوستي به له يوه نسل څخه بل ته انتقال کړي.
