په وروستيو کې د مصر د سنا مجلس د بهرنيو چارو د کمېټې رئيس محمد کمال د چین له خبريال سره د مرکې په ترڅ کې ويلي، د می ۳۰مه نېټه د مصر او چين ترمنځ د ديپلوماتيکو اړيکو د ټينګېدو له ۷۰مې کاليزې سره برابر ده، چې دا نه يوازې د دوه اړخيزو اړيکو د پرمختګ د ميل تيږه بلل کېږي، بلکې د دغو اړيکو د ژور مفهوم او دايمي حياتي ځواک ښکارندويي کوي.
ښاغلي کمال مصر او چین په نړۍ کې دوه لرغوني تمدن لرونکي هېوادونه بللي او ويلي يې دي، لرغوني تمدن د دواړو هېوادونو د دوامدارې تبادلې او ډيالوګ لپاره کلک بنسټ جوړ کړی دی.
هغه زياته کړې، چې د مصر او چين ترمنځ اړيکې اوږد تاريخ لري او د ګډو ګټو، پر سيمه يیزو او نړيوالو چارو د ښه پوهېدو او د پرمختګ او ثبات د لټولو د هيلو بنسټ دی.
چين او مصر يو بل هر اړخيز ستراتيژيک همکاران بولي او په وروستيو کلونو کې يې د صنعتي کېدو، د بنسټيزو تأسیساتو د ابادۍ او پانګونې په برخو کې خپلمنځي همکارۍ لا پياوړې کړې دي.
د ده په خبره مصر او چين ګډ نظر لري، چې که سوله او ثبات رامنځته نشي، نو پرمختګ به ونه مومي. نو دواړه خواوې غواړي د مثبتو او سالمو نړيوالو اړيکو د ساتلو لپاره ګډې هڅې وکړي، تر څو د ګډو ګټو پر بنسټ مشترکو برياليتوبونو ته ورسېږي او د نړۍ لپاره لا روښانه راتلونکې برابره کړي.
نوموړي پر دې ټينګار کړی، چې مصر تل د يو چين پېژندنې پر اصولو ټينګار کړی او دا يې د دې هېواد د ديپلوماتيکې تګلارې مهم بنسټ بللی دی.
هغه وويل، چې مصر يوازې يو چين پېژني او د چين له ولسي جمهوريت سره يې ډيپلوماتيکې اړيکې ساتي، هېواد يې دغه اصول د سيمې او نړۍ د ثبات د ساتلو لپاره ډېر مهم بولي.
د ده په خبره هره کړنه، چې له دې اصولو څخه سرغړونه ده، اسيا او نړۍ ته به ګډوډۍ رامنځته کړي.
هغه د منځني ختيځ د وضعيت د يادونې په ترڅ کې داسې ويلي، چې چين د دې سيمې سولې او ثبات، د بېړيو تګ راتګ او سوداګريزې ازادۍ ته په درنه سترګه ګوري او اقتصادي چارو ته د سياسي رنګ له ورکولو سره مخالفت کوي او هم يې د سعودي عربستان او ايران ترمنځ د ديپلوماتيکو اړيکو د اعاده کېدو لپاره منځګړیتوب کړی و. نو د ده په اند چين په منځني ختيځ کې د ثبات د ټنګښت لپاره يو مهم ځواک ګرځېدای شي.
ښاغلي کمال څو ځلې چین ته سفرونه کړي او هر ځل يې د چين هغه ستر پرمختګ او ترقي احساس کړي، چې چينايان ترې برخمن شوي دي.
هغه وويل، چې په وروستي سفر کې مې د چين د ساينس او ټکنالوژۍ چټک پرمختګ او د ځيرکو ښارونو د ابادۍ په ترڅ کې د دغې ټکنالوژۍ پراخه کارونه ليدلې او هم يې د چین په پوهنتونونو کې د پام وړ لاسته راوړنې احساس کړې دي.
هغه هم د نړۍ د سراسري جنوب هېوادونو پرمختیایي ګټو ته د چين پام ستايلی او هم یې د کمربند او لارې په چوکاټ کې د دواړو هېوادونو د اقتصادي همکاريو د لاسته راوړنو لوړه ارزونه کړې ده.
هغه چين د پرمختګ، پانګونې او د پوهنې ملکيت حق د انتقال په شمول څو برخو کې د مصر ډېر مهم همکار بللی او ويلي يې دي، چې د مصر او چين ترمنځ همکاريزې پروژې پر بنسټیزو تأسیساتو، توليدي چارو او ښوونې پسې تړاو لري، چې دا نه يوازې مصريانو ته ګټې رسولې، بلکې دوه اړخيزې اړیکې يې لا ټينګې کړې دي.
په ورته وخت کې هغه په مرکه کې دا ياد کړي، چې مصر او چين دواړه د نړۍ د سراسري جنوب په هېوادونو کې شامل دي، نو د پرمختیایی هېوادونو پر وړاندې د اقتصاد او اقليمي بدلون پر ننګونو ښه پوهېږي.
هغه پر دې ټينګار کړی، چې د نړۍ د سراسري جنوب هېوادونو په تېره بيا د مصر او چين ترمنځ د همغږۍ او همکاریو لا پياوړتيا ډېره مهمه ده. د ده په اند دا د چاپېريال ساتنې او دوام لرونکي پرمختګ د پرمخبېولو په برخو کې د اړوندو وړانديزونو د پلي کولو لپاره ګټوره ده او هم د څو اړخيزم، روښانه راتلونکې او ګډ پرمختګ پر بنسټ د نوې نړۍ د ابادۍ لپاره ګټه لري.
