د خاورو د صحرايي کېدو د مخنیوي او مبارزې لپاره د ملګرو ملتونو د تړون د بنسټ ايښودونکو ۱۷مه غونډه د اګست په ۱۷مه نېټه د مغولستان په پلازمېنې اولان باتور کې پرانيستل شوه.
د چين د بهرنيو چارو وزارت وياند لين جيان د روانې مياشتې په ۱۸مه نېټه په يوه خبري ناسته کې ويلي، چې هېواد يې د دغه تړون د بنسټ ايښودونکي په توګه خپلې دندې جدي پلې کړي او د صحرايي کېدو پر وړاندې د مبارزې په نړيوالو همکاريو کې یې فعال ګډون کړی دی.
نوموړي ويلي، چين پر هغې مفکورې ټينګار کوي، چې رڼې اوبه او زرغون غرونه د شتمنۍ سرچينې دي او د نړۍ لومړی هېواد دی، چې پکې دغه موخه عملي شوې ده: د ځمکې د ويجاړېدو اندازه يې نه زیاتېږي، د صحرا او شنډې خاورې پراخوالی يې د کمښت په حال کې دی او د ځنګلونو د پوښښ اندازه او د لرګيو زېرمه یې د مسلسلو ۴۰ کلونو لپاره زیاته شوې ده.
لين جيان ويلي، چين به په راتلونکۍ کې د خاورو د صحرايي کېدو د مخنیوي او مبارزې لپاره نړۍ ته خپلې طرحې په دوامداره توګه وړاندې کړي
