د چين دولت رئيس شي جين پينګ د اګست په ۱۸مې نېټې د بېجينګ د خلکو په لوی تالار کې د اکوادور له ولسمشر ډانيل نوبوا سره لیدلي او د دواړو هېوادونو پر اړيکو يې ورسره خبرې کړې دي.
سږ کال د چین او اکوادور د هراړخیزو ستراتيژیکو اړیکو د ټینګېدو لسمه کلیزه ده.
شي جين پینګ له ډانيل نوبوا سره په لیدنه کې ويلي، که د نړۍ وضعیت هر څنګه بدلېږي، چین به ستراتيژیکې سویې او لرې لید ته په کتو، له اکوادور سره اړیکې وپالي او د دوه اړخیزو اړیکو د ټینګښت د هڅولو او د دواړو هېوادونو خلکو ته د لا زیاتو ګټو د رسولو لپاره به له دغه هېواد سره اوږه په اوږه کوښښونه وکړي.
ښاغلي ډانیل نوبوا چین د اکوادور مهم ملګری او همکار ياد کړی او ويلي يې دي، چې دواړو هېوادونو په ګډو هڅو سره خپلو خلکو ته ګټې رسولې دي.
نوموړي ويلي، اکوادور غواړي، چې له چین سره متقابل سیاسي باور پیاوړی کړي او د تایوان مسئلې په اړه د بېجينګ د دریځ ملاتړ او درناوی کوي.
ډانیل نوبوا زياته کړې، اکوادور له چین سره همکاريو ته په ډېره درنه سترګه ګوري او غواړي د اقتصاد او سوداګرۍ، پولي چارو او ټکنالوژۍ په شمول ډېرو برخو کې له دغه هېواد سره اغېزمنې همکارۍ نورې هم پراخې او پیاوړې کړي.
