د چين د بهرنیو چارو وزارت ویاند لین جیان د اګست په ۲۴مې نېټې یوه مطبوعاتي کنفرانس ته ویلي، چې هېواد به يې له ملګرو ملتونو او نورو هېوادونو سره د مصنوعي ځيرکتيا د پرانيستي، ټولشموله، پراخ ګټور او د ټولو په خير پرمختګ لپاره ګډې هڅې وکړي.
نوموړي ويلي، د مصنوعي ځيرکتيا او د انساني پرمختګ ډيالوګ د اګست له ۲۰ مې تر ۲۱ مې نېټې پورې، د چين د بهرنيو چارو وزارت او ملګرو ملتونو په ګډ کوربتوب د دغه هېواد په شي ان ښار کې ترسره شو.
په دغه ډيالوګ کې د ملګرو ملتونو مرستیالې سرمنشۍ امنه محمد هم ګډون او وينا کړې او ويلي يې دي، چې د دې ډيالوګ لاسته راوړنې به د ملګرو ملتونو ۸۱مې عمومي اسامبلې ته هم وسپاري.
د چین دولت رئیس شي جین پینګ څه موده مخکې د بشري تمدن پرمختګ ته په کتو د مصنوعي ځيرکتيا نغښتو فرصتونو او ننګونو ته د ځواب ويلو په اړه څلور فقره يیز وړانديزونه کړي، چې پکې په ورخلاصون او ګټې-ګټې همکارۍ ټینګار کول، په خطرونو د پوهاوي پیاوړي کول، د ټولشموليت هڅول او د یووالي ملاتړ شامل دي.
لين جيان ويلي، د دغه ډیالوګ هدف د رئیس شي جین پینګ له مهمو څرګندونو سره سمون لري او په ډيالوګ کې د بېلابېلو هېوادونو ګډونوالو له تاریخي، فلسفي او عملي لیدونو څخه پر بشري پرمختګ د مصنوعي ځيرکتيا د ژورو اغېزو په اړه بحثونه کړي دي.
