د چين د سوداګرۍ وزارت د سپتمبر په ۱۷مه نېټه يوه نوبتي خبري ناسته ترسره کړه او د دغه وزارت وياند هه يا دونګ د ۳۰ميليارد ډالرو په اندازه د تعرفو د بالمثل کموالي په هکله له امريکا سره د مشورو تازه معلومات ورکړل. هغه وويل، اوس د چين او امريکا اقتصادي او تجارتي ډلې د اړوندو مضامينو په هکله نژدې تماسونه ساتي او وروسته به اړوند مالومات صادر کړي.
په خبري ناسته کې د چين په هکله د اروپايي ټولنې د کمېټې اړوند پاليسي د خبري رسنيو پاملرنې راجلب کړې دي. هه يا دونګ د اړوندې پوښتنې په ځواب کې وويل، چين دې ته پام اړولی چې د اروپايي ټولنې کمېټې د عامه پېرود د قانون مسوده خپره کړه او پکې يې اروپا ته د لومړيتوب ورکولو په اړه مادې ټاکل شوې، همدارنګه غواړي چې د ارزونې په معيارونو کې د امنيت په شمول غير بازاري عوامل شامل کړي او د دريم هېواد هغه شرکتونه چې شرايط پوره نه دي، ختم يا محدود کړي. چين دې ته ډېره پاملرنه کوي.
هه یا دونګ وویل چې د روان کال له پیل راهیسې اروپايي ټولنې په پرله پسې ډول د انټرنيټ د امنیت قانون د تعدیل مسوده، د صنعت د ګړندي کولو قانون مسوده او نورې مسودې خپرې کړې او بازار ته د لاسرسي شرایط یې په دوامداره توګه سخت کړي دي. چین له اروپايي ټولنې څخه غوښتنه کړې چې د سوداګرۍ نړيوال سازمان د مقرراتو مراعات وکړي او بازار دې پرانیستی وساتي، په تقنیني مسودو کې دې د سپکاوي مادې لرې کړي او په اروپا کې د شرکتونو د پانګونو او کاروبارو لپاره عادلانه، روڼ او غیر سپکاوی سوداګریز چاپېریال جوړ کړي.
