د چین دولت رئيس شي جین پینګ او د بروني سلطان حاجي حسن البولکیه د سپتمبر په ۳۰مه نېټه د دواړو هېوادونو د رسمي اړیکو د ټينګېدو د ۳۵مې کلیزې د نمانځنې په پار يو بل ته د مبارکۍ پيغامونه لېږلي دي.
شي جین پینګ په خپل پيغام کې اشاره کړې، چې د چین او بروني دودیزه دوستي لرغونی تاریخ لري او د وخت په تېرېدو سره لا نوره ټینګه پاتې شوې ده. په تېرو ۳۵ کلونو کې د چین او بروني متقابل سیاسي اعتماد پر له پسې ژور شوی، په بېلابېلو برخو کې د همکارۍ لاسته راوړنې يې ډېرې زياتې او کلتوري تبادلې يې هم پياوړې شوې دي. د هغه په خبره، تېر کال سلطان حاجي حسن البولکیه چین ته رسمي سفر وکړ، دواړو خواوو د چین او بروني د ګډ برخلیک ټولنې د جوړولو په اړه مهمه موافقه کړې، چې خپلمنځي اړیکې د تاریخي پرمختګ نوي پړاو ته دننه کړې.
شي جین پینګ په پيغام کې ټینګار کړی:” زه د چین او بروني د اړیکو پراختیا ته په ډېره درنه سترګه ګورم او غواړم چې له سلطان حاجي حسن البولکیه سره یوځای هڅه وکړم، د دواړو هېوادونو دودیزه دوستي لا نوره پراخه، يو د بل له پراختیايي ستراتیژیو سره همغږي پياوړې، ګټې- ګټې همکارۍ نورې ژورې کړو او د چین او بروني د ګډ برخلیک ټولنې جوړونه پرمخ بوزو، څو د دواړو هېوادونو خلکو ته ګټه ورسوو او د سیمې د سمسورتيا او ثبات لپاره نور زیات خدمت وکړو.
