افغان حکومت سمیع الحق ته: طالبان له جګړو را وګرځوه او سولې ته یې وهڅوه

افغان حکومت له ملا سمیع الحق غوښتي چې طالبان د سولې خبرو ته وهڅوي. د رسنیو د راپورونو له مخې یوه افغان پلاوي په اکوړه خټک کې له ملا سمیع الحق سره کتلي دي او هغه ته یې ویلي، چې په افغانستان کې د روانې اوږدې جګړې په پای ته رسولو کې مرسته وکړي. پلاوي سمیع الحق ته ویلي چې له خپل نفوذ په استفادې طالبان له جګړو وګرځوي او د سولې خبرو ته یې وهڅوي. سمیع الحق چې د طالبانو په معنوي پلار مشهور دی، په دې لیدنه کې افغان جګړه جهاد بللې ده. دده په وینا دی به هڅه وکړي ددې ستونزې په حل کې داسې همکاري وکړي، چې په وینا یې د روان جهاد لاس ته راوړنې ضایع نه شي. په افغانستان کې ډېری خلک په دې باور دي چې پاکستاني ملایان د ای ایس ای له لوري د خپلو موخو لپاره کارول کېږي او دوی ددغه ادارې په خوښه فتوا ورکوي. له همدې امله دوی ټول په یوه خوله په افغانستان کې روانه جګړه جهاد بولي. څو ورځې وړاندې بیا د کوټې مشهور دیني عالم مولانا شیراني په یوه مرکه کې ویلي وو، چې په افغانستان کې روانه جګړه ناروا ده، طالبان د پاکستان لپاره جګړه کوي او پاکستاني ملایان هغه نانځکې دي چې د ای ایس ای ډول ته ګډېږي.