مشرانو جرګه: حکومت مو د شپنیو عملیاتو د بندولو په تړاو غږ نه اوري

د مشرانو جرګې غړي وایي، د شپنیو عملیاتو د بندولو په تړاو د دوی غږ نه اوریدل کیږي. افغان او بهرنیو ځواکونو له تیرې یوې میاشتې راهیسې د میدان وردګو، کاپيسا، ننګرهار او پکتیا په ګډون د هېواد په بیلا بیلو ولایتونو کې د شپنیو عملیاتو په ترڅ کې لسګونه ملکي افغانان وژلي او دغو عملیاتو په کور دننه سخت غبرګونونه را پارولي دي. د مشرانو جرګې غړي د ګډو ځواکونو له لورې د شپنیو عملیاتو په ترسره کولو نیوکه کوي او وايي چې په وار وار یې د بهرنیو له لوري د شپنیو عملیاتو په غبرګون کې امنیتي ادارو ته شکایت کړی خو تر دامهاله یې په اړه هیڅ اقدام نه دی شوی. د مشرانو جرګې غړو همدا راز پخپله غونډه کې د جګړې خصوصي کیدو په اړه د ولمسشر غني له دریځ په ملاتړ سره وايي، چې بلک واټر ته روانه جګړه سپارل د حل لاره نه ده. ولسمشر ویلي وو، هېچا ته به اجازه ور نه کړي چې افغان جګړه خصوصي کمپنیو ته وسپاري.