د وینزویلا ولسمشر نېکولاس مادورو ویلي، حکومت هڅه کوي چې له سیاسي مخالفینو سره یوه سوله ییزه اجنډا جوړه کړي.
دا په داسې حال کې ده چې د ناروې حکومت وړمه ورځ تایید کړه، چې د وینزویلا د حکومت له استازو او سیاسي مخالفینو سره یې ابتدایي اړیکې ټینګې کړې دي.
د دغه هېواد د بهرنیو چارو وزارت ویلي، لا تر اوسه دا هڅې په لومړنیو مرحلو کې دي او پر بېلابېلو برخو غور او ارزونې روانې دي.
دغه وزارت ویلي: «موږ د یوې سوله ییزې حللارې د لټون لپاره د خپل ملاتړ دوام ته لېواله یو».
د ناروې د همدې منځګړیتوب د هڅو په لړ کې د وینزویلا ولسمشر ټینګار کړی، چې حکومت د خپلو سیاسي مخالفینو له استازو سره د یوې سوله ییزې اجنډا د جوړولو په لټه کې دی.
بلخوا د حکومت د سیاسي مخالفینو مشر خوان ګوایدو چې پخپله ناروې ته نه دی تللی، تایید کړې چې د وینزویلا د حکومت او سیاسي مخالفینو تر منځ د خبرو منځګړیتوب پیل کړی دی، خو دا یې رد کړې چې ګواکې دواړه لوري دې مخامخ خبرې سره وکړي.
د دواړو لورو استازي تېره اونۍ ناروې ته ورسېدل چې دا په وینزویلا کې د څو میاشتني بحران د ختمېدو لپاره د یوې نوې تګلارې څرګندویي کوي.
په وینزویلا کې له څو میاشتو راهیسې سیاسي کړکېچ د خوان ګوایدو په مشرۍ وروسته له هغې پیل شو، چې پر ولسمشر نېکولاس مادورو له بشري حقونو د سرغړونې او د دغه هېواد د اقتصادي چارو د ناسم مدیریت له کبله توندې نیوکې وشوې او سلګونه زره کسان یې له دندې څخه د لرې کېدو لپاره سړکونو ته راووتل، چې دغه لاریونونه وروسته پر تاوتریخوالي واوښتل او ډېرو کسانو ته پکې مرګ ژوبله هم واوښته.
په لومړي سر کې د خوان ګوایدو له خوا د خوځښت هڅه وروسته له هغې له ناکامۍ سره مخ شوه، چې د وینزویلا پوځ د هغو ملاتړ ونه کړ.
ولسمشر مادورو چې د روسیې، چین او کیوبا ملاتړ له ځانه سره لري، په ۲۰۱۳ ز کال کې ولسمشر وټاکل شو او بیا د دویم ځل لپاره یې په ۲۰۱۸ ز کال کې د ولسمشرۍ دویمې دورې لپاره لوړه وکړه، چې دغه کار له مخالفتونو سره مخامخ شو او سیاسي مخالفینو یې په رایو کې د درغلۍ تورونه ورباندې ولګول.
خوان ګوایدو چې د پارلمان مشري کوي، د روان کال په جنورۍ کې ځان د وینزویلا موقت ولسمشر اعلان کړ، چې تر اوسه یې د امریکا په ګډون، د پنځوسو هېوادونو ملاتړ ترلاسه کړی دی.
