د ایران د دولتي خبري اژانس اېرنا د راپور له مخې، د دغه هېواد ولسمشر حسن روحاني ویلي، چې د ایران حکومت د خپل اټومي پروګرام په اړه ټولپوښتنه کولای شي.
روحاني دا څرګندونې په داسې حال کې کوي، چې امریکا له ایران سره د ۲۰۱۵ ز کال له اټومي هوکړې وتلې او پر دغه هېواد یې هغه بندیزونه بیا لګولي، چې د دې هوکړې پر بنسټ لغوه شوي وو.
روحاني ویلي، ده په ۲۰۰۴ ز کال کې هم هغه مهال چې د ایران د لانجمن اټومي پروګرام په خبرو کې جګپوړی مرکچي و، مذهبي مشر ایتالله علي خامنهاي ته د ټولپوښتنې وړاندیز کړی و.
دا په داسې حال کې ده چې د ۲۰۱۵ ز کال د ایران او د نړۍ د شپږو قدرتونو ترمنځ د شوې هوکړې له مخې، ایران په هغه کچه د یورانیمو د غني کولو اجازه نه لري، چې د اټومي بم د جوړولو وړتیا ترلاسه کړي.
ایران په داسې حال کې چې له امریکا سره په لویه لانجه کې ښکېل دی، نه یوازې په کور دننه، بلکې د سیمې په کچه هم د ملاتړ د ترلاسه کولو په مقصد یو لړ فعالیتونه پیل کړي دي.
د دغو هڅو په ترڅ کې د ایران د بهرنیو چارو وزیر جواد ظریف بغداد ته تللی او د دغه هېواد له چارواکو سره یې خبرې کړې دي.
د عراق د پارلمان مشر محمد حلبوسي پر دولتي ټلوېزیون د وینا پر مهال ویلي، چې که له عراقه غوښتنه وشي، د ایران او امریکا ترمنځ د کړکېچ د حل لپاره منځګړیتوب ته چمتو دی.
د حلبوسي له خبرو څو شېبې وروسته، ظریف د دوه ورځني سفر په موخه بغداد ته ورسېد.
بلخوا د عراق د لومړي وزیر عادل عبدالمهدي له دفتره په خپاره شوي بیان کې راغلي، چې لومړي وزیر او ظریف پر هغو لارو چارو بحث کړی، چې څنګه دغه دوه هېوادونه او سیمه د بندیزونو او احتمالي جګړې له زیانونو څخه په امن کې پاتې شي.
بیان زیاته کړې چې دوی همدا راز د منځني ختیځ د امنیت او ثبات او د ایران د اټومي موافقې د پر ځای پاتې کېدو په اړه هم خبرې کړې دي.
دا په داسې حال کې ده چې تر دې وړاندې جواد ظریف د جمعې په ورځ پاکستان ته تللی و او هلته یې له لومړي وزیر عمران خان او نورو چارواکو سره کتلي دي.
د فارس خبري اژانس د راپور له مخې، ظریف په اسلاماباد کې د څرګندونو پر مهال پر نړیواله ټولنه غږ کړی، چې د هغه څه پر وړاندې چې ده د ایران پر ضد د امریکا د زور او تشدد چلند وباله، اقدام وکړي.
ظریف وویل، سیمه اوسمهال په کړکېچن حالت کې ده او خطرناک اقدامات پکې روان دي.
هغه زیاته کړې چې ایران د روان کړکېچ د حل لپاره له خپلو ګاونډیانو سره سلامشورو ته اړتیا لري.
