عربستان قطر ته په دوو بېړنیو غونډو کې د ګډون بلنه ورکړې

عربستان له اوږدو ناندریو وروسته قطر ته په یوه غونډه کې د ګډون بلنه ورکړې ده. د قطر د بهرنیو چارو وزارت وایي د سعودي عربستان پادشا ورته لیک استولی او له دوی یې غوښتي چې د سعودي عربستان او عربي هېوادونو په دوو بېړنیو غونډو کې ګډون وکړي. له اوږدې مودې راهیسې د سعودي عربستان او قطر ترمنځ اړیکې ترینګلې وې. عربستان قطر د ترهګرو په ملاتړ تورناوه او پر دغه هېواد یې ګڼ بندیزونه وضع کړل. اوس تازه سعودي عربستان په یوه بې ساري اقدام کې دغه هېواد ته بلنه ورکړې چې په دوو بېړنیو ناستو کې ګډون وکړي. ددغه ناستو هدف په سیمه او عربي هېوادونو کې ثبات ساتل او نارامیو له منځه وړل ښودل شوی دی. قطر تر دې دمه مهال په دغه غونډه کې د ګډون پرېکړه نه ده کړې.