د پښتون ژغورنې غورځنګ مشر منظور پښتین ويلي، چې د پاکستان پوځ د شمالي وزیرستان د «دته خېلو» په خړ کمر کې په عامو خلکو ډزې کړې او مرګ ژوبله یې ور اړولې ده.
پښتین دغه راز د پاکستان پوځ تورن کړی چې په سوله ییزو مظاهرهچیانو یې برید کړی دی.
هغه ویلي: «علي وزیر، د پاکستان د پارلمان غړی او ډاکتر ګل عالم، د وزیر د لویې جرګې مشر را روان وو. په وروستي چک پوسټ کې یې ترې سمه تلاشي هم واخیستله. کله چې دوی اعتراضیه ناستې ته نږدې کېدل، له شا یې ډزې پرې وکړې چې پکې څه کسان شهیدان شول او په لسګونه زخمیان دي. د محسن داوړ په غاړه کې د ګلونو هار و، نو دوی چې دلته حملې ته راتلل، نو ګلونه یې راوړل؟ ګولۍ خو ستا په لاس کې وې. ټوپک خو ستا (د پاکستان پوځ) په لاس کې وي».
عیني شاهدانو او د سیمې اوسېدونکو د ازادې اروپا مشال راډیو ته ویلي، چې امنیتي سرتېرو د وزیرستان لویې جرګې د غړو او مشرانو، په پارلمان کې د شمالي او جنوبي وزیرستان استازو محسن داوړ او علي وزیر، د پښتون ژغورنې غورځنګ مخکښانو او ځايي مشرانو یوه قافله پر خړ کمر پوستې ودروله او یوې اعتراضیه ناستې ته یې له ورتګه منعه کړل.
بلخوا د پاکستان د پوځ مطبوعاتي دفتر ویلي چې محسن داوړ او علي وزیر د مشکوکو ترهګرو د یوه ملګري خوشې کولو په هدف پر پوځ فشار اچول غوښتل.
د پاکستان د پوځ مطبوعاتي دفتر ویلي چې علي وزیر او اته نور کسان دوی بندیان کړي دي.
د پښتون ژغورنې غورځنګ مشر بېګاه د ملګرو ملتونو سازمان او د بشري حقونو پر مدافع سازمانونو هم نیوکه کړې، چې د عامو خلکو د وژنې پر خلاف غږ پورته کړي.
