په عراق کې یوې محکمې د داعش دوو نورو فرانسوي جنګیالیو ته هم د اعدام سزا واوروله.
دغه دوه فرانسوي جنګیالي پر دې تورن دي، چې د داعش په لیکو کې په عراق او سوریه کې جنګېدلي دي. چارواکو ویلي چې دغه دوه جنګیالي براهیم نجارا او کرام الهرچاوي نومیږي او عمرونه یې ۳۰ کاله ښودل شوي دي.
دا په داسې حال کې ده چې عراق تر دې مخکې څلور نور فرانسویان هم په همدغه تور پر مرګ محکوم کړي وو. دوی د جنورۍ په میاشت کې په سوریه کې ونیول شول او د تېرې جنورۍ په میاشت کې عراق ته ولېږدول شول، څو محاکمه شي.
په همدې حال کې د فرانسې د بهرنیو چارو وزارت ویلي، چې پر اعدام محکوم شویو فرانسویانو ته به حقوقي خدمتونه برابر کړي.
محکوم شوي کسان یوه میاشت لري چې د محکمې د پرېکړې پر ضد اعتراض وکړي. د فرانسې د خبري اژانس د راپور په اساس، فرانسه د داعش لیکو ته ورغلیو فرانسویانو ته سزا غواړي، خو د اعدام له سزا سره مخالفه ده.
عراقي چارواکو ويلي، د ۲۰۱۸ ز کال له پیل راهیسې یې ۵۰۰ بهرني جنګیالي له داعش سره د تړاو په تور محکوم کړي دي. په دغو جنګیالیو کې یې ځینې په مرګ او ځینې یې زندان ته لېږل شوي دي، خو لا یې یو هم اعدام شوی نه دی.
