برازیلي چارواکو ويلي، د دغه هېواد د امازون ولایت په څلورو زندانونو کې، د زندانیانو ترمنځ په شخړو کې لږ تر لږه ۴۰ بندیان وژل شوي دي.
چارواکو ويلي، دا پېښه د یاد ولایت په یوه زندان کې د څو ډلو ترمنځ په نښتو کې د ۱۵ بندیانو تر وژل کېدو یوه ورځ وروسته شوې ده.
د چارواکو په خبره، دوی ۴۲ زندانیان په داسې حال کې موندلي، چې راځوړند شوي وو، خو ځینو چارواکو ویلي، ډېری بندیان د فضا د تنګېدو له کبله مړه شوي دي.
د بندیانو ترمنځ دغه نښتې د یکشنبې په سهار پیل شوې، چې په لومړۍ ورځ پکې لږ تر لږه ۱۵ بندیان وژل شوي وو، ځینې په چړو وهل شوي وو، خو وروسته بیا معلومه شوه چې ځینې بندیان راځړول شوي هم دي.
بلخوا د دغو زندانونو ادارو ویلي چې د زندانیانو ترمنځ نښتې یې مهار کړې او د لاملونو په اړه یې څېړنه پیل شوې ده.
د یوه بندي مور چې د خپل زوی د لیدو لپاره زندان ته تللې وه، ویلي: «هلته وضعیت بشپړ ګډوډ و، ټولو ورونه ټکول او شاوخوا یې منډې وهلې».
د یادونې ده چې په یاد زندان کې دوه کاله مخکې هم پاڅون وشو، چې بیا پر تاوتریخوالي واوښت او په پایله کې یې ۵۶ کسان ووژل شول.
د رسمي شمېرو له مخې، په برازیل کې د بندیانو شمېر تر ۷۱۲ زرو اوړي او دغه هېواد د ډېرو بندیانو لرلو له پلوه په نړۍ کې درېیم هېواد دی.
د دغه هېواد په زندانونو کې ډېری وخت د بندیانو د ساتلو لپاره د زندان خونې کفایت نه کوي او له همدې کبله د زندان د ننه د ځینو ډلو ترمنځ اخ او ډب او یا ان د وژنې پېښې هم رامنځته کېږي.
د یادونې ده چې په ۱۹۹۲ ز کال کې د دغه هېواد په ساو پاولو کاراندیرو زندان کې له اورپکو سره د جګړې پر مهال ۱۱۱ بندیان ووژل شول، چې ډېری یې د پولیسو لخوا په ډزو کې وژل شوي وو.
