د سينهوا اژانس د خبر له مخې، د چين د دولت رئيس شي جين پينګ د جون په ۶مه نېټه په ساينټ پيترسبورګ کې يو ځل بيا د روسيې له ولسمشر ولاډيمير پوټين سره وکتل. رئيس شي جين پينګ د ولسمشر پوټين په بلنه د بيړۍ په وسيله له نوموړي سره يو ځای د نيوا سيند سيل وکړ. پوټين د شي جين پينګ هر کلی وکړ چې يو ځل بيا د ده ټاټوبي ته سفر کوي او د سيل په ترڅ کې يې له شي جين پينګ سره د ساينټ پيترسبورګ د دودونو او د سيند پر غاړه د پرتو ودانيو په اړه معلومات شريک کړل. شي جين پينګ وويل، ډېر خوشحاله يم چې د ولسمشر پوټين له ټاټوبي ساينټ پيترسبورګ څخه ليدنه کوم.
شي جين پينګ له پوټين سره يو ځای د اورورا په نامه کروزر ته وخوت چې د شوروي د اکتوبر مياشتې انقلاب د توپ لومړی ډز له دې کروزر څخه وشو، او د دغه کروزر په اړه يې معلومات واوريدل. شي جين پينګ وويل، د اورورا په نامه کروزر د چينايانو لپاره ستر اهميت لري. ځکه چې د شوروي د اکتوبر مياشتې انقلاب د توپ له لومړي ډز وروسته مارکسيزم چين ته خپور شوی او د چين د کمونېست ګوند د رامنځته کېدو بنسټ کېښود.
ورپسې، د دواړو هېوادونو مشرانو د ژمي په ماڼۍ کې خبرې اترې وکړې او د اوسنيو نړيوالو حالاتو او مهمو نړيوالو او سيمه ييزو مسئلو په اړه يې د نظريو تبادلې وکړې.
شي جين پينګ په دغو خبرو اترو کې پر دې ټينګار وکړ چې چين او روسيه اوسمهال د خپلو هېوادونو د پرمختګ او د ملتونو د بياسمسورتيا لپاره مهم تاريخي پړاو ته ننوتلي دي. دواړه هېوادونه بايد د اوسنيو حالاتو پر وړاندې ستراتيژيکې همکارۍ ژورې کړي. دا نه يوازې د دواړو هېوادونو د ګټو د ساتلو لپاره، بلکې د نړيوالو قواعدو او اخلاقو د ساتلو لپاره ګټوره ده، څو د نړۍ سوله، امنيت او ثبات وساتل شي.
پوټين وويل، روسيه او چين بايد د پېچليو نړيوالو حالاتو پر وړاندې متقابل سياسي باور ټينګ کړي او په نړيوالو چارو کې خپله همغږي پياوړې کړي، څو نړيوال قوانين او د نړيوالو اړيکو اصول وساتل شي.
