سعودي: د تیلو پر ټانکرونو باندې د برید تر شا د ایران لاس دی

د سعودي عربستان، متحده عربي اماراتو او ناروې یوه گډ پلاوي ویلي، د هغوی لومړنۍ پلټنې ښیي چې “په یو هیواد پورې اړوندې ډلې” د متحده عربي اماراتو په سواحلو کې د تیلو په ټانکرونو باندې تیره میاشت برید کړی و.دغه پلاوي په دې هکله یوه گډه اعلامیه خپره کړې او هغه یې د ملگرو ملتونو سازمان ته سپارلې ده. په اعلامیه کې راغلي چې د لومړنیو پلټنو پر اساس تیز رفتاره کیښتیو ځانونه، دې بېړیو ته رسولي او د اوبو بمونه یې په دې ټانکرونو کې ځای پر ځای کړي دي. اعلامیه وایي: “سره له دې چې پلټنې لا روانې دي، خو دغه اطلاعات ښیي چې ټول څلور بریدونه شوي دي. که څه هم چې دې پلاوي د کوم ځانگړي هیواد نوم نه دی یاد کړی، خو په ملگرو ملتونو کې د سعودي عربستان سفیر ویلي، ټول شواهد ښیي چې ایران ددغه برید تر شا لاس لرې. له دې وړاندې امریکایي چارواکو هم پر ایران ورته تورونه لگولي وو. د امریکا د ملي امنیت سلاکار جان بولټن، تیره میاشت ابوظبۍ ته د سفر پر مهال ویلي وو “څرگنده ده چې ایران ددې بریدونو تر شا لاس لري. خو ایران دغه تورونه رد کړي او هغه یې د امریکا د تبلیغاتو یوه برخه گڼلې ده.