په سوریه کې د وسله والو او حکومتي ځواکونو ترمنځ د تېرو دوو ورځو په جګړو کې لږ تر لږه ۱۶۸ کسان وژل شوي دي. د سوریې د بشري حقونو د څار ډله چې په لندن کې مېشته ده په یوې خبر پاڼه کې ویلي، د شنبې په ورځ جهادي ډلو او نورو وسله والو د حما ولایت په څنډو کې پر حکومتي ځواکونو تازه بریدونه کړي دي. دې ډلې ویلي چې وسله والو پر حکومتي ځواکونو لسګونه توغندي ویشتي او د چاودېدونکو موادو یو بار موټر سره یې پر حکومتي ځواکونو ځانمرګی برید کړی. د سوریې د بشري حقونو د څار ډله وايي، د شنبې د ورځې په نښتو کې د سوریې د حکومت لږ تر لږه ۳۷ سرتېري او ۲۸ وسله وال وژل شوي دي. په دې نښتو کې د حکومتي ځواکونو او وسله والو تر څنګ ملکیان هم وژل شوي دي. یاده ډله وایي، چې په تېرو دوو ورځو کې ټول لږ تر لږه ۱۶۸ کسان وژل شوي دي.
