د پيو په نوم د امريکا يو څېړنيز مرکز وايي، په افغانستان کې د ترهګرۍ پر خلاف ۱۷ کلنه جګړه ناکامه ده.
پيو وايي، نږدې نيمايي امريکايي ځوانان پر دې باور دي چې امريکا تر ۱۷ کاله جګړې وروسته هم په افغانستان کې خپلو موخو ته نه ده رسېدلې.
امريکا ۱۷ کاله وړاندې له ترهګرۍ سره د مبارزې په پلمه په افغانستان کې جګړه پيل کړه چې له کبله يې لسګونه زره افغانانو ته مرګ ژوبله اوښتې ده.
امريکا د دې جګړې په پيل کې ځينې ژمنې کړې وې، چې تر دې مهاله يې نه يوازې کړې ژمنې پوره نه کړې بلکې وضعيت يې لا ترينګلی کړ.
د پيو څېړنيز مرکز موندنې ښيي چې امريکا د افغانستان په جګړه کې له ناکامۍ سره مخ ده.
که څه هم ويل کېدل چې د افغان جګړې لپاره به د امريکا د ولسمشر ډونالډ ټرمپ تګلاره وضعيت بدل کړي، خو د افغانستان د بهرنيو چارو پخوانی وزير رنګين دادفر سپنتا وايي چې ياده تګلاره هم ناکامه ده.
سپنتا زياتوي: «د امريکا د ولسمشر ډونالډ ټرمپ تګلارې په هېواد کې هېڅ مثبته پايله نه ده درلودلې او د افغانستان وضعيت لا هم کاواکه دی».
په افغانستان کې له ترهګرۍ سره د امريکا د جګړې د ناکامۍ پړه پر پاکستان ور اچول کېږي. د چارو شنونکي وايي، له ترهګرو د پاکستان ملاتړ د دې سبب شوی چې له ترهګرۍ سره مبارزه ناکامه شي.
د سياسي چارو شنونکی نصرت الله حقپال وايي: «زموږ په نظر، امريکا له ترهګرۍ سره په مبارزې، د افغانستان په بيارغونې او د نشه يي توکو د کښت په محوه کولو کې هېڅ پرمختګ نه دی لرلی».
په افغانستان کې د امريکا د جګړې د ناکامۍ په تړاو د پيو څېړنيز مرکز څرګندونې په داسې حال کې دي چې تازه برېټانوۍ ګارډين ورځپاڼې هم د يوه مطلب په خپرولو سره د افغانستان جګړه ناکامه بللې او ويلي يې دي چې د لسګونه زره افغانانو او ناټو سرتېرو په وژل کېدو سره سره هم دې جګړې د پام وړ لاسته راوړنه نه ده لرلې.
