د افغان سولې لپاره د امريکا ځانګړي استازي زلمي خليلزاد څلورو هېوادونو ته د خپل سفر پايلې د ولسمشر اشرف غني په مشرۍ د افغان دولت له مشرانو سره شريکې کړې دي.
له ارګه په خپره شوې خبرپاڼه کې ويل شوي چې په دې کتنه کې د ولسمشر دویم مرستیال سرور دانش او اجرائيه رييس ډاکتر عبدالله عبدالله هم حضور درلود.
سرچينې زياته کړې، ډاکتر زلمي خلیلزاد ولسمشر اشرف غني ته بېلابېلو هېوادونو ته د خپلو وروستیو سفرونو په اړه د راپور ورکولو پر مهال وویل، د امریکا متحده ایالات د سولې په برخه کې د افغانستان د حکومت په مشرۍ هر ډول همکارۍ ته چمتو دي او په دې برخه کې د دوی کوښښونه ادامه لري.
په خبرپاڼه کې راغلي، ولسمشر غني د افغانستان د سولې لپاره د امریکا د بهرنیو چارو وزارت د ځانګړي استازي زلمي خلیلزاد له راپور او هلو ځلو په مننې وویل، د هر هغه اقدام او هڅې مننه او قدرداني کوو چې په افغانستان کې د تلپاتې سولې د تامین لپاره اخیستل کېږي.
د افغان سولې لپاره د امريکا د ځانګړي استازي په توګه تر ټاکل کېدو وروسته، زلمي خليلزاد تېره اونۍ خپل سفر له افغانستان څخه پيل کړ.
هغه په کابل کې له ولسمشر اشرف غني، ډاکتر عبدالله، پخواني ولسمشر حامد کرزي، استاد سياف، ګلبدين حکمتيار او ځينو نورو مشرانو سره وليدل او د سولې په اړه یې ورسره مشورې وکړې.
له کابل وروسته زلمى خليلزاد پاکستان ته ولاړ او د دغه هېواد له پوځي او ملکي مشرانو سره يې پر افغان سولې خبرې وکړې.
زلمی خليلزاد بيا سعودي او متحده عربي اماراتو ته ولاړ او هلته يې تر خبرو اترو وروسته قطر ته سفر وکړ او د دغه هېواد د بهرنيو چارو له وزير سره يې وليدل.
