د سولې عالي شورا ځينې غړي وايي، د افغان سولې په تړاو د مسکو کنفرانس جوړېدل به مثبتې پایلې ولري.
د افغانستان د سولې په تړاو د مسکو د ناستې د ترسره کېدو په اړه د روسي چارواکو له څرګندونو وروسته، د افغانستان د سولې عالي شورا يو شمېر غړي وايي، د دغه کنفرانس جوړېدل به په افغانستان کې د سولې له ټينګښت سره مرسته وکړي.
د دې شورا يوه غړي محمد امین وقاد ازادي راډيو ته ويلي چې د دغه کنفرانس د جوړېدو په اړه که په بشپړ ډول د افغان حکومت نظر واخيستل شي، نو پرته له شکه چې په افغانستان کې د سولې د ټینګښت لپاره به دا ناسته ګټوره تمامه شي.
وقاد وايي: «اوس که دغه تشه ډکه شي او په مسکو کې په کنفرانس لکه څنګه چې مخکې ویل شوي وو، ترسره شي، ښه نتیجه به ولري او موږ هم له هغو پروګرامونو چې په مثبت ډول پرمخ وړل کېږي، هرکلی کوو.»
دا په داسې حال کې ده چې د افغانستان په چارو کې د روسیې د ولسمشر ځانګړي استازي ضمیر کابلوف ویلي چې ښايي د روانې ميلادي میاشتې تر ورستیو پورې د مسکو ناسته ترسره شي.
د روسي رسنیو د معلوماتو له مخې، ښاغلي کابلوف د دې ناستې د کره نېټې او ګډونوالو په اړه څه نه دي ویلي.
د مسکو ناسته چې ټاکل شوې وه د سپټمبر میاشتې په څلورمه نېټه ترسره شي، د افغان حکومت په غوښتنه وځنډول شوه.
افغان حکومت تل پر دې ټينګار کړی چې د دغه هېواد د سولې په تړاو ټولې ناستې دې د افغانانو په مشرۍ او مالکیت ترسره شي.
بهرنیو چارو وزارت او وسله والو طالبانو تر دې مهاله د مسکو د احتمالي ناستې په اړه د کابلوف د څرګندونو په اړه څه نه دي ویلي.
خو له دې وړاندې ویل شوي وو چې طالبان په دغه ناسته کې ګډون کوي او د افغانستان او امریکا په ګډون د سیمې له هېوادونو غوښتل شوي وو چې په دغه ناسته کې برخه واخلي.
په ورته وخت کې د نړیوالو اړیکو کارپوه انتظار خادم بیا روانو حالاتو ته په اشارې سره وايي چې اوس امریکا او روسیه دې نتیجې ته رسېدلي چې د افغانستان سوله یې په ګټه ده.
نوموړي ویلي: «د افغانستان د سولې بهیر اوس داسې حالت ته رسېدلی چې امریکا یې غواړي او د روسیې ګټې هم پکې نغښتې دي، اوس دغه کنفرانس باید ترسره شي، ځکه چې د افغانانو په ګډون، روسیه او امریکا هم اوس په دې پوهېدلي چې د افغانستان سوله يې په ګټه ده، نه جګړه.»
دا په داسې حال کې ده چې د امریکا د بهرنیو چارو وزارت ځانګړي استازي زلمي خلیلزاد تازه د افغانستان د سولې په تړاو د سیمې له هېوادونو سره خبرې کړې دي.
خادم دې موضوع ته په پام سره وايي چې د افغانستان د سولې په اړه هڅې تر بل هر وخت زیاتې شوې او دا د دې ښودنه کوي چې د سولې بهیر بالاخره بریا ته رسېږي.
