د فراه ولایتي چارواکي، وړمه شپه د دغه ولایت د پشت رود په ولسوالۍ کې له وسله والو طالبانو سره په جګړه کې د افغان پوځ سرتېرو ته درنه مرګ ژوبله اوښتې ده، خو د شمېر په اړه یې یوه خوله نه دي.
د فراه د ولایتي شورا رییس فرید بختور د دغه ولایت د پشت رود په ولسوالۍ کې د افغان پوځ پر پوستو د وسله والو طالبانو د وړمې شپې په برید کې افغان پوځ ته د رسېدلو تلفاتو په اړه وویل چې په دغه جګړه کې د ملي اردو لس سرتېري وژل شوي او پنځه نور ټپیان دي.
بختور ویلي چې د وسله والو طالبانو له خوا د پشت رود ولسوالۍ د «دوکین» په سیمه کې د ملي اردو په دوو پوستو له برید وروسته یوولس سرتېري لا درکه شوي هم دي.
خو د ۲۰۷ ظفر قول اردو ویاند نجیب الله نجیبي امریکا غږ اشنا راډیو ته ویلي چې د پشت رود ولسوالۍ د وړمې شپې په جګړه کې د ملي اردو څلور سرتېري وژل شوي، پنځه نور ټپیان او درې نور لا درکه دي.
طالبانو په یوه اعلامیه کې د پشت رود په ولسوالۍ کې د ملي اردو د دوو پوستو د نیولو خبر ورکړی او ادعا یې کړې چې په دغو نښتو کې یې د ملي اردو پنځه ویشت سرتېري وژلي او دوولس ټپي سرتېري یې له ځان سره وړي دي.
