بخښنې نړیوال سازمان د امریکا په مشرۍ پوځي ایتلاف غندلی

د بخښنې نړیوال سازمان د امریکا په مشرۍ پوځې ائتلاف له دې کبله غندلی چې د رقه په ښار کې د داعش پر ضد د جګړې په ترڅ کې د ولسي خلکو ته د اوښتې مرګ ژوبلې په منلو یا په‎ دې برخه کې په کافي اندازه څېړنو کې پاتې راغلی دی. د سوریې پر رقه ښار د امریکا په مشرۍ ائتلاف له دې ښاره د داعش د وسله‎ والې ډلې د ایستلو لپاره هوايي بمبارۍ کړې وي. په هغه راپور کې چې نن د بخښنې نړیوال سازمان خپور کړی په‎ کې ویل شوي، د ائتلاف دا اقدامات په‎ دې ښار کې د ژوندیو پاتې شوېو پر مخ څپېړه ده چې هڅه کوي بېرته خپل ژوند جوړ کړي. د بخښنې د نړیوال سازمان منشي کومي نایډو وايي، دا ځورونکې ده چې پنټاګون حتی دې ته هم چمتو نه ښکاري چې د رقه په جکړه کې د سلګونو ملکیانو د وژنې له کبله بخښنه وغواړي. پنټاګون چې ترې دې مخکې یې د بخښنې د نړیوال سازمان د څېړنې پر میتود نیوکه کړې وه، په سېپټمبر کې په یوه بیان کې ویلي و، دوی په خپلو هوايي بریدونو کې په پوره دقت د اهدافو په نښه کولو ته دوام ورکوي، څو په سیمه کې په ملکي خلکو او تاسیساتو د دې عملیاتو اغېزې تر ټولو کم حد ته را ورسوي.