ولسي جرګې د ټاکنیزو کمپاينونو تر پیل وروسته هره اونۍ یوازې د دوشنبې په ورځو کې ناسته ترسره کوله، خو پرون د وکیلانو د غیر حاضرۍ له امله دا ناسته هم ترسره نه شوه.
د ولسي جرګې د نوماندانو ټاکنیزې سیالۍ د تلې په سپږمه پيل شوې او د همدې میاشتې تر ۲۵ مې دوام لري. د ولسي جرګې ټاکنې د روانې میاشتې په ۲۸ مه ترسره کېږي.
د ولسي جرګې رییس د تلې په څلورمه ویلي وو چې دا جرګه د ټاکنیزو مبارزو په جریان کې په یوه اونۍ کې یوه ورځ کار کوي، خو کارپوهانو له مصوبې پرته د جرګې دا تصمیم ناقانونه بللى و.
پرون د ولسي جرګې شاوخوا لس غړو په ملي شورا کې حضور درلود او د دې جرګې ناسته ترسره نه شوه.
د ولسي جرګې پرونۍ غونډې ته راغلو د دې جرګې ځینو غړو د وکیلانو پر ناسوبتیا سخته نیوکه وکړه.
په ولسي جرګه کې د کابل د خلکو استازي ذکریا ذکریا چې د دې جرګې پرونۍ غونډې ته راغلی و، وویل چې د جرګې زیاتره غړي په ټاکنیزو مبارزو بوخت دي او له همدې امله د دې جرګې پرونۍ غونډه ترسره نه شوه.
هغه زیاته کړه چې پرونۍ غونډې ته د جرګې له منشي عرفان الله عرفان پرته د یادې جرګې د اداري پلاوي غړي هم نه وو راغلي.
نوموړي له خلکو وغوښتل چې هغو نوماندانو ته رایه ورکړي چې مسوولیت منونکي وي.
په ولسي جرګه کې د فاریاب د خلکو استازی عبدالستار درزابي بل هغه کس دی چې د دې جرګې پرونۍ غونډې ته ورغلی و. هغه د ذکریا د خبرو په تایید وویل چې د جرګې د اداري پلاوي ضعف او د زیاتره وکیلانو مسوولیت نه منل د دې لامل شوي چې پرونۍ ناسته ترسره نه شي.
خو د ملي شورا بل حاضر غړي چمن شاه اعتمادي وویل چې د ولسي جرګې ۹۹ سلنه غړي د دې جرګې غړیتوب ته نوماندان دي او حق لري چې د خلکو د رایو د ترلاسه کولو لپاره د خلکو په منځ کې شتون پیدا کړي، :ځکه د ولسي جرګې ټاکنو ته لږ وخت پاتې دی.
