په ختيځ کې د ۲۰۱ سيلاب قول اردو په روزنيز کمپ کې روزل شوي د سيمه ييزې اردو درې ټولي تر فراغت وروسته د ننګرهار دريو ولسواليو ته ولېږل شول.
د چارواکو په وينا، دغه ۳۴۰ کسان به په پچيراګام، هسکې مېنې او خوږياڼو ولسواليو کې پر دندو وګومارل شي.
د سيلاب قول اردو درستيزوال تورن جنرال اسدالله کوهستاني وايي چې د سيمه ييزې اردو دغه سرتېري د پچيراګام، خوږياڼو او هسکې مېنې ولسواليو اوسېدونکي دي او بېرته په همدغو سيمو کې پر دندو ګومارل کېږي.
کوهستاني وايي چې ياد سرتېري به د ټاکنو په ورځ هم د امنيت په ټينګښت کې ونډه واخلي.
د سېلاب قول اردو د ښوونې او روزنې مسوول ډګروال رحمت الله وايي، له زده کړو تازه فارغ شوي ۳۴۰ کسان د ولسونو په خوښه انتخاب شوي، درې مېاشتې يې نظامې روزنه ليدلې او تمه ده چې د امنيت په ټينګښت کې مهم رول ولوبوي.
د يادولو ده چې تر دې وړاندې هم سيلاب قول اردو د لغمان او کاپيسا ولايتونو لپاره د سيمه ييز پوځ دوه ټولي فارغ کړي چې اوس عملاً په دغو ولايتونو کې پر دندو بوخت دي.
په سيمه ييز پوځ کې هغه کسان پر دندو ګومارل کېږي چې وړاندې يې د ملي اردو په ليکو کې دنده ترسره کړې وې.
که څه هم د ملي دفاع وزارت د سيمه ييز پوځ د رامنځته کولو ننګه کوي، خو شنونکي وايي چې د امنيت د ښه ټينګښت لپاره بايد د ملي اردو پر ښه تجهيز او روزنې تمرکز وشي.
