د المپیک ملي کمېټې د فري فایټ لوبو پر اتل احمدولي هوتک د شوي بريد په اړه د جدي څېړنو غوښتنه کړې ده.
د المپیک د ملي کمېټې سکرتر جنرال يونس پوپلزي پرون په دې اړه د اندېښنې په څرګندولو سره ازادي راډیو ته ویلي چې امنیتي ارګانونه باید د دې پېښې عاملین ژر تر ژره ونیسي او د قانون منګلو ته يې وسپاري.
پوپلزی زیاتوي: «موږ په لومړي قدم کې دغه عمل د خپل يو ملي اتل په وړاندې چې خپل هېواد ته یې ډېرې لاسته راوړنې لرلې دي، په کلکو ټکو غندو، دا اعمال غير انساني، غیر بشري او غير اسلامي دی، هغه هم په داسې حال کې چې يو لوبغاړی سیالیو ته تیاری نیسي، له حکومته مو په دې برخه کې جدي غوښتنه ده چې د پېښې عاملین ونیسي او قانوني چلند دې ورسره وکړي».
دا په داسې حال کې ده چې وړمه شپه شاوخوا ۱۱ بجې څو تنو ناپېژاندو کسانو د کابل ولایت د بګرامیو ولسوالۍ په حسین خېلو سیمه کې د رزمي لوبو د اتل احمد ولي هوتک کور ته څېرمه د هغه پر موټر ډزې کړې او تر هغې وروسته یې نوموړی په چړو او سوکانو وهلی دی.
په ټولنیزو رسنیو کې په خپرو شویو ویډيوګانو او انځورونو کې ليدل کېږي چې احمدولي هوتک په ګېډه، سر او د اوږو په برخه کې ټپي شوی دی.
له دې پېښې څو ساعته وروسته احمد ولي هوتک په يوه ويډیويي پيغام کې چې تر څنګ یې د المپيک د ملي کمېټې ريیس او مرستیاله هم لیدل کېږي، د خپل روغتیايي حالت ډاډ ورکړ او ويې ویل چې خپل هېواد او ولس ته یې د خدمت په لار کې دا شان بريدونه د ده د کړي هوډ مخه نه شي نیولی.
د کورنیو چارو وزارت مرستیال ویاند نصرت رحیمي وايي چې په احمدولي هوتک د برید کوونکو شمېر پنځه تنه و چې د نیولو لپاره يې هڅې روانې دي.
رحيمي ويلي: «کورنیو چارو وزیر د جنايي څېړنو موظفینو او د کابل پولیسو ته په جدي توګه هدایت ورکړی دی چې د دې پېښې عاملین ژر تر ژره ونیسي او د قانون منګولو ته یې وسپاري».
د یادونې ده چې احمدولي هوتک څو ورځې مخکې په امریکا کې له پنځه میاشتنيو تمریناتو وروسته کابل ته راستون شو او د اکټوبر په ۱۹ مه یې د خپل روسي سیال مکسیم شیکین په وړاندې د لوبې خبر ورکړ.
د رزمي لوبو دغه افغان اتل تر دې مهاله شل نړیوالې لوبې کړې چې په ۱۹ کې یې بریاوې خپلې کړې دي.
