د ټاکنو د خپلواک کمېسیون مشر له دیني عالمانو وغوښتل، څو خلک په ټاکنو کې ګډون کولو ته وهڅوي.
د کمېسیون مشر عبدالبدیع صیاد پرون په کابل کې يوې غونډې ته د خبرو پر مهال وويل چې ديني عالمان بايد د ټاکنو د بهير د لا برياليتوب لپاره له خپل اغېز او نفوذ څخه ګټه واخلي.
د هغه په خبره، له ناخوالو او بحران د وتلو یوازېنۍ لار ټاکنې دي.
د ټاکنو کمېسیون دا ګام په داسې مهال کې اخلي چې تېره اونۍ طالبانو د يوې خبرپاڼې په خپرولو سره له افغانانو وغوښتل چې په ټاکنو کې ګډون ونه کړي.
د ټاکنو د خپلواک کمېسيون مشر وويل: «دیني عالمانو! دا تاسو پورې تړل کېږي چې خلکو ته څنګه لارښوونه کوی چې چا ته باید رایه ورکړي، داسې یوه کس ته باید رایه ور کړي چې په ولسي جرګه کې د دوی سم استازیتوب وکړي. اسلامي ارزښتونو او اصولو ته درناوی ولري.»
دا لومړی ځل دی چې افغان ځواکونو په یوازې سر د ټاکنو امنیت نیسي.
د ټاکنو د روڼتيا په تړاو د اندېښنو تر څنګ، د ټاکنيزو مرکزونو او رايه ورکوونکو امنيت لویه اندېښنه ګڼل کېږي. دا اندېښنه په داسې حال کې ده چې د ټاکنو د امنيت د ټينګښت مسووليت د لومړي ځل لپاره افغان ځواکونو ته ور په غاړه شوی دی.
د ملګرو ملتونو يو رپوټ وايي، له تېرو پنځو میاشتو راهیسې د ټاکنو په بهير کې تر سلو ډېر کسان وژل شوي او تر ۲۶۰ نور ټپیان شوي دي.
د ټاکنو کمېسیون هم وايي چې د ولسي جرګې نهه نوماندان په بریدونو کې وژل شوي دي.
له دې ټولو سره سره د کورنيو چارو وزات د ټاکنو د امنيت لپاره خپل پلان اعلان کړی او ډاډ ورکوي چې د ټاکنيزو مرکزونو او رايه ورکوونکو امنيت به خوندي کړي.
د کورنيو چارو وزارت ویاند نجیب دانش وايي، د امنیتي پلان له مخې د ټاکنو بهیر د امنیت د خوندیتوب لپاره د رایې مرکز ته نږدې په اول کمربند کې استخبارات او پولیس ځای پر ځای کېږي: «له درې سوو تر پنځه سوو مترو واټن کې ملي اردو او درېیم کمربند کې افغان پوځ، پولیس او استخبارات په ګډه ګرځنده او ثابته دنده لري.»
نوموړی دا هم وايي چې د ټاکنیز بهیر ټول مسوولیت د افغان ځواکونو پر غاړه دی او که اړتیا شي نور سرتېري به هم وګوماري.
د دفاع وزارت ویاند وايي چې افغان پوځ د رایه ورکوونکو، نوماندانو او کارکوونکو امنیت ته ژمن دی.
نوموړی ټينګار کوي چې: «دفاع وزارت ټول افغان ولس ته ډاډ ور کوي چې په ارامه فضا کې په ټاکنو کې ګډون وکړي. هوايي او ځمکني ځواکونه په هر حالت کې امنيت ته ژمن دي او که د نورو ځواکونو اړتیا هم شي تیار دي او مرسته به رسوي.»
نوموړی د امنیتي اندېښنو په غبرګون کې وايي چې د ټاکنو لپاره د ۵۰ زرو سرتېرو ځای پرځای کول امنیتي تشه نه رامنځته کوي.
د چارواکو په وینا شاوخوا ۳۰۰ زره امنیتي او دفاعي سرتېري به په لومړۍ درجه احضاراتو کې وي.
