د امریکا په کانګرېس کې جمهوري پالو او ډیموکراټو مشرانو د ولسمشر ټرمپ د استیضاح قضیې پر اصولو لانجه کړې ده.
د کانګرېس ډیموکراټان د دې خبرې تضمین غواړي چې ولسمشر ټرمپ د عادلانه محاکمې لپاره باید شاهدانو او د اسنادو ښودلو ته اجازه ورکړي.
دا په داسې حال کې ده چې پر ټرمپ تور دی چې د پوځي مرستو په بدل کې یې پر اوکراین فشار راوړی چې د ده د سیاسي سیال جو بایډن پر ضد د فساد قضیه پرانیزي.
د ډیموکراټانو یوه مهم مشر چک شومر ویلي، اوکراین ته د مرستو په اړه یو مهم افشا شوي برېښنالیک وښوده چې په دې قضیه کې باید روڼوالی وي.
په ورته وخت کې د جمهوري پالو مشر مېټ مېکانل ویلي، په دې محاکمه کې د شاهدانو د حاضرېدو شونتیا شته، خو ښکاره یې نه دي ویلي چې له خلکو به شاهدي اخیستل کېږي.
دا په داسې حال کې ده چې د امریکا د استازو جرګې تېره اونۍ ولسمشر ټرمپ له واکه د ناوړه ګټې اخیستلو او د کانګرېس د کار د مخنیوي په تور استیضاح کړ. د جمهوري پالو مشر مېټ مېکانل ویلي، ښایي په محاکمه کې شاهدانو ته د حاضرېدو اجازه ورکړل شي.
د یادونې ده چې ټرمپ د امریکا په تاریخ کې درېیم هغه ولسمشر دی چې د استازو جرګې له خوا استیضاح کېږي او اوس به په سنا کې محاکمه کېږي، خو د ولسمشر ټرمپ جمهوري پال ګوند په سنا کې اکثریت لري او تمه نه کېږي چې دی به له واکه لرې شي.
ټاکل شوې چې په کانګرېس کې به د ولسمشر ټرمپ محاکمه د کرسمېس له رخصتیو وروسته د راتلونکي کال په جنورۍ میاشت کې پیل شي.
ډیموکراټان غواړي چې په دې قضیه کې د دوی څلورو شاهدانو ته د شاهدۍ ورکولو اجازې ضمانت ورکړل شي. دا څلور شاهدان د سپینې ماڼۍ اوسني او پخواني سلاکاران دي چې د دې قضیې او د اوکراین له ولسمشر سره د ولسمشر ټرمپ د ټلیفوني مکالمې په اړه مالومات لري.
دا په داسې حال کې ده چې ولسمشر ټرمپ پر ځان لګېدلي تورونه بیا بیا رد کړي او ادعا کوي چې ډیموکراټانو د ده پر ضد دسیسه جوړه کړې ده.
