د ایران سپاه پاسداران انقلاب ځواکونو ویلي چې د تېلو هغه بېړۍ یې نیولې، چې په غیر قانوني ډول یې تېل لېږدول.
ایراني خبري آژانسونو راپور ورکړی، چې دغه بېړۍ چې څه باندې یو میلیون لېتره تېل یې لېږدول، په هورمزتنګي کې د ابو موسی ټاپو ته څېرمه درول شوې ده.
د ایران فارس خبري آژانس د دغه هېواد د سپاه پاسداران انقلاب ځواکونو د یوې اعلامیې په حواله ویلي، چې د تېلو دغه بېړۍ د یوه بهرني هېواد بیرغ لري، خو سرچینې د هغه هېواد نوم نه دی په ډاګه کړی.
په ورته وخت کې ایرنا خبري آژانس هم د ایران د سمندري ځواکونو د یوه قوماندان علي عظمایي له قوله ویلي چې په دې بېړۍ کې یو میلیون او ۱.۳۱۲ میلیونه لېتره قاچاقي تېل او ۱۶ مالیزیایي عمله نیول شوې ده.
دغه راز ځینو نورو ایراني رسنیو ویلي چې له دې بېړۍ سره یوځای ۱۲ بهرني وګړي چې د بېړۍ عمله وو، نیول شوي دي.
خو تر دې دمه هېڅ نړیوال سوداګریز شرکت یا بهرنیو حکومتونو په دې اړه څه نه دي ویلي.
دا په داسې حال کې ده چې د ایران سمندري ځواکونه وخت ناوخت په فارس خلیج او هورمزتنګي کې د تېلو د قاچاق په تور کوچنۍ بېړۍ دروي، چې پراخ نړیوال غبرګونونه یې راپارولي دي.
خو له دغو غبرګونونو او خبرداریو سره سره، ایراني ځواکونو روان میلادي کال د نورو هېوادونو بیرغ لرونکې څو نړیوالې تېل وړونکې بېړۍ هم نیولې دي.
ایران وروسته له هغې دغه اقدام وکړ چې امریکا تېر کال پر ایران اقتصادي بندیزونه زیات کړل او د ایران د تېلو د صادراتو اونړیوالو مارکېټونو ته یې د دغه هېواد د لاسرسي مخه ونیوله.
په ورته وخت کې لوېدیځو هېوادونو د روان کال په سر کې د ایران یوه تېل وړونکې بېړۍ په دې تور ونیوله چې د دوی په خبره، د نړیوالو بندیزونو پر خلاف یې سوریې ته په پټه تېل لېږدول، خو له اوږدو ناندریو او جنجالونو وروسته دا بېړۍ بېرته خوشې شوه.
د یادونې ده چې ابو موسی جزیره چې د ایران په واک کې ده، د جغرافیایي موقعیت او سټراتېژیک اهمیت له کبله په تېرو څو لسیزو کې د ایران او عربي متحده اماراتو تر منځ د لانجې سیمه ده.
