د چک خلک: چک جمهوریت دې خپل ځواکونه له افغانستان وباسي

چک جمهوریت کې یو شمېر سیاسیونو او وګړو له خپل حکومت غوښتي چې خپل سرتېري دې په تدریج له افغانستان وباسي. په دې ډله کې ددغه هېواد د بهرنیو چارو پخواني وزیر لابومیر زواریک له خپل حکومت غوښتي چې د ناټو د نورو غړو په څېر دې په تدریج چکي عسکر هم له افغانستان ووځي. دده په وینا په افغانستان کې د چک جمهوریت سرتېري پاتې کېدل د چک لپاره په لوړه بیه پرېوځي او هلته یې ژوند له خطر سره مخ دی. هغه زیاتوي چک جمهوریت په وروستیو درې میاشتو کې څلور قربانیان په افغانستان کې ورکړي دي او دا مسئله نوره د چک خلکو ته د زغم وړ نه ده. سیاسیونو دغه څرګندونې وروسته له دې کړې چې وړمه ورځ په هرات کې د چک جمهوریت تبعه عسکر د افغان سرتېري په ډزو ووژل شو. د چک جمهوریت حکومت تر اوسه په دې اړه څه نه دي ویلي.