د راپورونو له مخې د ننګرهار د روداتو ولسوالۍ لسګونه خلکو د ملکي وګړو د وژل کېدو په غبرګون کې اعتراض کړی دی او دغه لاره یې د ترافیکو پر مخ تړلې ده. دوی ادعا کوي چې تېره شپه افغان ځواکونو په روداتو ولسوالۍ کې شپني عملیات کړي دي او په دغه عملیاتو کې ملکي وګړو ته مرګ ژوبله اوښتې ده. دوی ددغه کسانو جسدونه ورسره راوړي او د تورخم جلال اباد په لار کې یې اېښي دي. هڅه مو وکړه په دې اړه د ولایت مقام نظر واخلو خو بریالي نه شوو. بل پلو د کورنیو چارو وزارت بیا دغه عملیات تاییدوي خو د ملکي وګړو د وژل کېدو په اړه څه نه وایي. د کورنیو چارو وزارت ویاند نصرت رحیمي ویلي، چې د ننګرهار په روداتو ولسوالۍ کې تېره شپه عملیات شوي او ددغه عملیاتو پر مهال ۱۴ داعشیان وژل شوي، څلور ټپیان او ۶ شکمن کسان نیول شوي دي.
