حامد کرزی: طالبان او حکومت دې د سولې لپاره پر یو بل شرطونه نه اېږدي

د افغان جګړې د حل او تلپاتې سولې لپاره دې افغان حکومت او طالبان پر یو بل د شرطونو اېښودل بس کړي. پخواني ولسمشر حامد کرزي له امریکا غږ سره په خپله وروستۍ مرکه کې ویلي، چې که طالبان رښتیا غواړي افغان جګړه پای ته ورسول شي، امریکایان له هېواد ووځي، یو پیاوړی حکومت په افغانستان کې جوړ شي او د بهرنیانو د لاسوهنو مخه ونیول شي نو د سولې خبرې دې وکړي او روانو ناندریو ته دې د پای ټکی کېږدي. دده په خبره افغان حکومت او طالبان دې پر یو بل د شرطونو اېښودل بس کړي ځکه له دې ناندریو یوازې بهرنیان او د افغانستان دښمنان ګټه پورته کوي. هغه زیاته کړې بهرنیان هېڅکله د افغانستان ارامي نه غواړي نو طالبانو ته په کار ده چې پر بین الافغاني خبرو پيل وکړي. هغه ویلي که موقع ورته برابره شي نو تیار دی چې له طالبانو سره مخامخ خبرې وکړي او دوی سولې ته وهڅوي. پخواني ولسمشر حامد کرزي همدا راز روانې ټاکنې بې وخته بللې دي او په وینا یې ښه به وی چې حکومت له طالبانو سره د سولې په موخه دغه ټاکنې ځنډولې وای. هغه ټینګار کړی چې که طالبان سوله کوي او د سولې لپاره د موقت حکومت شرط ږدي نو پر ټاکنو دې لګښتونه نه کېږي بلکې ددغه مسلې لپاره دې معقول حل ولټول شي.