د ولسي جرګې ګڼو غړو ددغه غونډې په امتیازي ساعت کې د خبرو پر مهال وویل، دوی د ټاکنیزو سیالیو پر مهال په دې بریالي نه شول، چې موکلینو ته یې د خپلو لاس ته راوړنو په اړه قناعت ورکړي. د وکیلانو په خبره ولس وایي چې د ولسي جرګې دغه دوره یوازې په سیاسي او خپلمنځیو اختلافاتو لګیا وه او د هېواد لپاره یې د پام وړ او مهم کار نه دی کړی. وکیلان وايي ولسي جرګه بریالۍ نه شوه چې خپله نظارتي دنده په سمه توګه ترسره کړي او همدا راز د هېواد په ګټه مهم قوانین تصویب کړي. ځينو وکیلانو د ولسي جرګې پر اداري پلاوي غږ وکړ چې په پاتې دوه میاشتني وخت کې دې خپل نظارتي قوت پياوړی کړي او راتلونکي پارلمان ته دې خپلې ستونزې په میراث نه پرېږدي. وکیلانو پر تېرو ټاکنو هم ګڼې نیوکې لرلې او په وینا یې د ټاکنو کمیسیون بریالی نه شو، چې تېرې ټاکنې په سمه توګه مدیریت کړي. دوی وایي د ټاکنو کمیسیون باید په دې اړه ولس ته وضاحت ورکړي او دغه ملي پروسه دې نه زیانمنوي.
