طالبان: پر طالب مشرانو بندیزونه نمایشي او بې اغېزې دي

وسله والو طالبانو د امریکا لخوا پر ځینې طالب مشرانو او د هغوی پر ملاتړو بندیزونو ته په اشارې ویلي، چې پر طالبانو د امریکا بندیزونه نمایشي او بې اغېزې دي. د طالبانو لخوا په خپرې شوې اعلامیه کې راغلي، چې د اسلامي امارت مشران یو هم له امریکا سره کومه اقتصادي معامله نه لري، نو بناً دا بندیزونه نمایشي او بې اثره دي. د سرچینې په وینا په دې توګه امریکا یا نه غواړي د افغانستان مسئله د خبرو، تفاهم او تعقل له لارې حل شي او یا هم د امریکا په حکومت کې دننه ژور اختلافات دي، چې ځینې کړۍ یې نه غواړي د افغانستان مسئله له سوله ییزې لارې حل او فصل شي.اعلامیه کې راغلي، امریکا اوس هم د زور او فشار له افشنه کار اخلي چې په تیرو ۱۷ کالونو کې يې نتیجه صفر وه. اعلامیه دغه راز کاږي، دوی د امریکا دغه ډول اقدام په کلکه غندي او په نړۍ کې يې د انسانانو له مشروع او منلو شوو آزادیو او حقوقو څخه بربنډه سرغړاوی بولي. طالبانو ویلي، امریکا دې له بې ځایه او تبلیغاتي هڅو را وګرځي او له پارونکو ګامونو نه دې لاس پر سر شي. دوی دغه راز پر اسلامي هېوادونو په ځانګړي توګه سعودي هم نیوکه کړې چې د امریکا په اشاره دې د اسلامي نړۍ پر شخصیتونو بندیزونه نه لګوي. طالبانو یو ځل بیا پر امریکا غږ کړی، چې افغان سولې ته د رسېدو یواځینۍ لار تفاهم دی او پرته له دې به د هر ډول فشار د بدو عواقبو مسؤلیت د امریکا پر غاړه وي.