طالبان: ملا برادر له کومې معاملې پرته خوشی شوی دی

وسله والو طالبانو تاييد کړه چې د طالبانو پخوانى مرستيال ملا عبدالغني برادر په پاکستان کې له زندان څخه خوشې شوى دى. طالب وياند ذبيح الله مجاهد، رسنیو ته په رالېږلې خبرپاڼه کې د ياد مطلب په څرګندولو سره ويلي چې نوموړى له تېرو نهو کلونو راهيسې په پاکستان کې بندي و او اوس له زندان څخه راخلاص شوى دى. ده زياته کړې، د نوموړي د خلاصون په لړۍ کې هيڅ راز معامله او واسطه نه ده رامنځ ته شوې. د هغه په وينا، ملا برادر له ښې روغتيا څخه برخمن دى. ملا عبدالغني برادر چې د طالبانو له بنسټ اېښودونکو شمېرل کېږي، په ٢٠١٠ زېږديز کال کې هغه مهال د پاکستان له خوا په کراچۍ ښار کې ونيول شو چې د دې ډلې مرستيال و. د يادونې ده، په ١٣٩٢ لمريز کال کې هم د ملا برادر د خوشې کېدو راپورونه ورکړل شوي وو چې د افغان حکومت او سولې شورا له خوا هم تاييد شوي وو، خو وروسته معلومه شوه چې خوشی شوى نه دى. د افغانستان حکومت له تېرو څو کلونو راهیسې څو ځله له پاکستانه د ملا برادر د خوشې کولو غوښتنې کړې، خو هغوى يې دا غوښتنه نه ده منلې. ملا عبدالغني برادر د اروزګان ولايت د دهراوود ولسوالۍ اوسېدونکى دى او د پوپلزيو په قوم پورې تړاو لري.