دې هېل: امریکا دې په افغانستان کې خپل لیونتوب ودروي

امریکایي لیکوال چارلز وو دې هېل نشریې ته په یوه مقاله کې لیکلي دي امریکا په افغانستان کې ۱۷ کاله تکراري تجربه مخ ته وړې ده او د یوې ناکامې تجربې بیا بیا تکرار لیونتوب دی نو امریکا دې په افغانستان کې خپل لېونتوب ودروي. د لیکوال په خبره امریکا کولی شي د اوربند او سیاسي مذاکراتو پر مټ په افغانستان کې روانه جګړه ختمه کړي او همدا راز د خپل دایمي حضور او نظامي اډو لپاره لار هواره کړي خو د جګړو د تکراري تجربې پر مټ امریکا په افغانستان کې بریا ته نه شي رسېدلی. د لیکوال په خبره د بې ګټې او ناکامو تجربو تکرار نه یوازې دا چې امریکا له ماتې سره مخ کوي، بلکې په سیمه کې لا ډېرو ناندریو ته لمن وهي او د امریکایانو مالیاتو په یوه بې پایلې او بې ګټې جګړه کې لګول کېږي. لیکوال همدا راز د امریکا پر حکومت غږ کړی چې د افغان حکومت د قوت او ددغه هېواد د جوړېدو لپاره دې هم پر خپلو پلانونو له سره کار وکړي او په دغه هېواد کې روانې ناخوالې دې نورې له سیمه ییزو هېوادونو سره په همکارۍ او مشوره پای ته ورسوي.