د وردګ ولایت سیمه ییز چارواکي وايي، د دغه ولایت په مرکز میدان ښار کې پرون شنبه سهار موټربم برید شوی چې پرمهال یې شپږ کسان وژل شوي او ۳۱ نور ټپيان دي.
د دغه ولایت د والي ویاند عبدالرحمان منګل پرون ازادي راډيو ته وویل، برید نن سهار مهال شااوخوا نهه بجې په دغه ولایت کې د پولیسو د موټرو د ترمیم مرکز مخې ته د سراچه ډوله موټر په واسطه شوی چې پرمهال یې پنځه کسان وژل شوي او ۱۲ نور ټپيان دي.
نوموړی وايي، بریدګر غوښتل چې د ترمیم یاد مرکز ته داخل شي، خو بریدګر د دغه ځای د ساتونکو له خوا تر برید لاندې راغی چې وروسته یې د دغه مرکز په دروازه کې چاودنه وکړه.
ښاغلي منګل وویل:
“پرون شنبې سهار شااوخوا نهه بجې موټربم چې ځان مرګی بریدګر هم پکې ناست و او غوښتل یې چې په میدانښار کې د پولیسو د موټر د ترمیم یوه مرکز ته ځان داخل او هلته د یاد مرکز پر کارکوونکو ځان مرګی او موټربم برید وکړي، خو د دغه مرکز د مخې ساتونکي یې په نښه او چاودنه يې وکړه چې پرمهال يې پنځه کسان وژل شوي او ۱۲ تنه نور ټپيان شول.»
د دغه ولایت د عامې روغتیا رییس ډاکټر سالم اصغرخېل ازادي راډيو ته وویل، په یاد برید کې ۳۷ کسانو ته مرګ ژوبله اوښتې چې له ډلې یې شپږ کسان وژل شوي او ۳۱ نور ټپيان دي.
نوموړی زیاتوي، په وژل شو کسانو کې یو پولیس او پنځه ملکیان شامل دي اوټپیان ټول ملکیان دي چې ښځي اوماشومان پکښي دي.
د یاد برید مسوولیت وسله والوطالبانو منلی او ویلي چې د یاد برید پرمهال یې لسګونه افسران وژلي.
