د پکتيا د بېلابېلو سيمو ناروغان او ناروغ لرونکي شکايت کوي چې په حوزوي روغتون کې د روغتيايي خدمتونو کيفيت خورا ټيټ دی او د ناروغانو ستونزو ته یې رسېده ګي نه کېږي.
دوی وايي چې ځينې ډاکټران په رسمي وخت کې په خپلو شخصي کلينيکونو کې وي او ډېری وخت ناروغانو ته له روغتون څخه درمل نه ورکول کېږي.
د پکتيا د ولايتي شورا غړی ممتاز کرخېل وايي چې د حوزوي روغتون ډېری کارکوونکي د اړيکو پر اساس او يا د پيسو په بدل کې ګومارل شوي دي.
کرخېل پژواک ته ويلي: «ډېری ډاکټران د لياقت له مخې نه، بلکې د اړيکو له مخې راغلي دي. کله چې يو ډاکټر په واسطه راشي او لياقت ونه لري، له هغو نه د خدمت تمه لرو او نه به خلکو ته خدمت وکړي. شفاخانې ته ناروغان راځي او بېرته رخصتېږي، نه د ډاکټرانو ښه وضعيت شته، نه مناسبه دوا شته او نه مناسب متخصصين شته.»
د ولايتي شورا بل غړي محمدرحمن قادري ويلي چې د عامې روغتيا وزارت بايد د دغه روغتون د ستونزو حل ته جدي پاملرنه وکړي.
قادري وايي: «د پکتيا له ملکي روغتون څخه اکثره مراجعين يا ناروغان شکايت کوي؛ ځکه کله چې دوی ناروعان هلته وړي، ډاکټران پر وخت هغه ته نه رسېږي، هېڅ ارزښت ناروغ ته نه ورکوي او نه يې ګوري.»
د پکتيا د عامې روغتيا رييس ډاکټر ولايت خان احمدزی وايي چې د روغتون ټول کارکوونکي د ازموينو له لارې په شفاف ډول ګومارل شوي دي.
احمدزی دغه راز وايي چې د روغتون ډېری ستونزې حل شوې او د ځينو نورو د حل په هڅه کې دي.
نوموړي زياته کړې: «د روغتون لپاره مو بودجه را انتقال کړې او پرسونل مو نيولی دی. هغه خدمات چې يو حوزوي روغتون يې وړاندې کوي، دا روغتون يې وړاندې کوي. ورسره په دې کې ځينې برخې لکه د سترګو، هډوکو، د جلدي او عقلي او عصبي څانګې هم لرو.»
د يادونې ده چې ياد روغتون لومړی په دوه سوه بسترونو کې د پکتيا لپاره جوړېده، خو د روغتون په جوړېدو کې د ميليونونه ډالرو فساد له امله په سل بستره کې جوړ شو چې لومړۍ درجې ولايت ته د پکتيا له ارتقا سره سم ياد ولايتي روغتون هم حوزوي ته بدل شو.
د پکتيا اوسېدونکي نيوکه کوي چې د ولايتي روغتون يوازې لوحه پر حوزوي بدله شوې، خو نور يې امکانات او وسايل نه دي زيات شوي.
