په کندهار کې د ولسي جرګې ټاکنې په يوه اونۍ ځنډ سره پرون ترسره شوې.
که څه هم د ولسي جرګې ټاکنې د تلې په ۲۸مه پلان شوې وې، خو په کندهار کې د هغې ترهګريزې پېښې له کبله چې د دغه ولايت امنيه قوماندان پکې ووژل شو، ټاکنې له يوې اونۍ ځنډ سره مخ شوې.
د کندهار په ټاکنو کې د تمې خلاف د خلکو، په ځانګړي ډول مېرمنو، ګډون خورا پراخ و خو د ټاکنو خپلواک کمېسيون يو ځل بيا هم پر دې بريالی نه شو چې په پروسه کې شته نيمګړتياوې او تخنيکي ستونزې هوارې کړي.
د تېرې اونۍ د شنبې ورځې په ټاکنو کې د هېواد په مختلفو ولايتونو کې په پروسه کې ځينې تخنيکي ستونزې وې، چې له کبله يې ګڼ شمېر خلک په ټاکنو کې له ګډون کولو بې برخې شول.
د ټاکنيزو مرکزونو په ځنډ پرانيستل کېدل، پر وخت ټاکنيزو مرکزونو ته د رايه ورکوونکو د نوملړونو نه رسېدل او د بايومېټريک دستګاوو خرابوالی هغه ستونزې وې چې د تېرې اونۍ ټاکنې يې اغېزمنې کړې.
که څه هم د ټاکنو خپلواک کمېسيون رييس ګلاجان عبدالبديع صياد وړمه ورځ ويلي وو چې د تېرې اونۍ له ټاکنو يې ښه درس اخيستی او شته تخنيکي ستونزې يې هوارې کړې خو له کندهاره را رسېدلي راپورونه وايي چې ستونزې پر خپل ځای وې.
ويل کېږي چې په کندهار کې ټاکنيز مرکزونه پر وخت خلاص نه شول، په ځينو مرکزونو کې د رايه ورکوونکو نوملړونه نه وو او دغه راز په ځينو نورو مرکزونو کې بيا د بايومېټريک دستګاوو کار نه کاوه.
له دې ټولو ستونزو سره سره د کندهار ولايت اوسېدونکو په ټاکنو کې پراخ ګډون درلود او له امنيتي اندېښنو سره سره يې د خپلې خوښې وړ نوماندانو ته رايې ورکړې.
په ورته مهال د ټاکنيزو شکايتونو کمېسيون د ټاکنو پر خپلواک کمېسيون نيوکه کوي چې د کندهار ټاکنو ته يې لازم چمتووالی نه و نيولی.
د ټاکنيزو شکايتونو کمېسيون غړی او وياند علي رضا روحاني وايي، د کندهار په ټاکنو کې د تېرې اونۍ د ټاکنو د ستونزو تکرار ښيي چې کمېسيون د کندهار ټاکنو ته هېڅ راز چمتووالی نه و نيولی. روحاني وايي، د ټاکنو کمېسيون د نيمګړتياوو او تخنيکي ستونزو تر تکرار وروسته خپلې کمکارۍ ته هېڅ توجيه نه شي موندلی.
کندهار په ولسي جرګه کې ۱۱ څوکۍ لري چې ۱۱۲ تنه ورته نوماندان دي. د دغه ولايت له معروف او نېش ولسواليو پرته، چې د ناسم امنيتي وضعيت له کبله پکې ټاکنې ونه شوې، په ټول کندهار کې ۱۷۲ ټاکنيز مرکزونه پرانيستل شوي وو چې خلکو پکې د خپلې خوښې وړ نوماندانو ته رايې ورکړې.
د کندهار ټاکنې له امنيتي پلوه هم له کومې جدې ننګونې سره مخ نه شوې.
د کورنيو چارو وزارت وايي چې د ټاکنو پر ورځ په کندهار کې ۱۵ زره پوليس پر دندو وو چې ۶ زرو يې يوازې د ټاکنيزو مرکزونو امنيت خوندي کړی و.
