د امریکا سفارت؛ د سوداګرو د ستونزو په اړه له پاکستاني لوري سره خبرې کوي

د سوداګرۍ او پانګونې خونه وايي د امریکا سفارت ډاډ ورکړی چې د افغان صادراتو په وړاندې د پاکستان د دروازې د تړلو د مسئلې په اړه به له یاد هېواد سره بحث وکړي. د دې خونې د عامه اړیکو مسوول امین بابک ویلي، اوس‌ مهال چې د افغانستان د وچې او تازه مېوې او سبزيجاتو د حاصل موسم دی پاکستان د افغان صادراتو په وړاندې خپل بندرونه تړلي او اجازه نه ‌ورکوي چې د افغانستان توليد تازه او وچه مېوه دغه هېواد ته صادره شي. دی وايي د افغانستان د پانګونې خونې مسوولینو او يو شمېر افغان سوداګرو په کابل کې د امریکا سفارت له مرستیالې سره د پانګونې او سوداګریزو مسايلو په اړه يو وېډیو کنفرانس درلود او د امریکا سفارت د مرستیالې له لوري په دغه کنفرانس کې د نورو خبرو ترڅنګ دا ډاډ هم ورکړل شو چې د دې موضوع په اړه به په کابل کې د پاکستان سفارت او په ټوله کې د پاکستان له حکومت سره خبرې وکړي.