ازبکستان: له پاکستان غواړو چې په افغان سوله کې همکاري وکړي

ازبکستان وایي له پاکستان غواړي چې د افغانستان د سولې په پروسه کې همکاري وکړي. د افغانستان لپاره د ازبکستان د ولسمشر ځانګړي استازي عصمت الله ایرګاشف ویلي چې هېواد یې د افغانانو په مشرۍ او مالکیت د سولې له هر ډول خبرو ملاتړ کوي او په دې برخه کې همکاریو ته تیار دی. نوموړي ویلي چې په همدې تړاو به پر طالبانو هم له سوله ییزو لارو فشار راوړي څو له افغان حکومت سره د سولې خبرو ته حاضر شي. دده په خبره په وروستیو کې به له پاکستان سره هم خبرې وکړي او له دوی به وغواړي چې د افغانستان د سولې په پروسه کې همکاري وکړي. عصمت الله ایرګاشف تېره ورځ هم د هرات په کنفرانس کې د خبرو پر مهال ویلي وو، چې هېواد یې له افغانستان سره د سولې په برخه کې همکاریو ته ژمن دی او په همدې تړاو له طالبانو سره په اړیکه کې دي. هغه ټینګار کړی چې د افغانستان سوله او ثبات د ټولې سیمې د هر اړخیز پرمختګ لپاره خورا ستر ارزښت لري.