افراسیاب خټک: څوک چې له افغانستان سره اړیکې جوړول غواړي، پوځ یې ختموي

د پاکستان پوځ هېچا ته اجازه نه ورکوي چې له هند او افغانستان سره اړیکې ورغوي. پخواني سناتور افراسیاب خټک ویلي نواز شریف ځکه د پوځ له لوري د یوې دسیسې ښکار او له دندې ګوښه کړل شو، چې غوښتل یې له هند او افغانستان سره ټولې ستونزې حل کړي. خټک زیاتوي د پاکستان پوځ د حکومت هېڅ مشر ته ددې اجازه نه ورکوي چې له افغانستان او هند سره د اړیکو جوړولو هڅه وکړي. دده په وینا هر څوک چې دا جرات وکړي د پوځ له لوري دسیسه ورته جوړېږي او له دندې لرې کېږي. نوموړي د پاکستان پر نوي حکومت هم غږ کړی دی چې د سیمې له هېوادونو سره دې د اړیکو جوړولو کوښښ وکړي، ځکه د پاکستان راتلونکې د سیمې له هېوادونو سره په ښو اړیکو پورې تړلې ده. دده په خبره څومره چې د سیمې هېوادونه له پاکستان ناراضه کېږي، نو دومره په دغه هېواد کې اقتصادي رکود رامنځ ته کېږي او خلک له سلګونه ستونزو سره مخ کېدلی شي. خټک همدا راز ټینګار کړی چې پاکستانی حکومت باید د افغانستان د سولې په برخه کې رښتینی او عملي ګام اوچت کړي او په دغه هېواد کې دې د جګړو پای ته رسولو په برخه کې هڅه وکړي.