ولسمشر غني: هلمند کې د خلکو او امنیتي ځواکونو تر منځ باور د ستاینې وړ دی

ولسمشر غني نن سهار هلمند ولایت ته په خپل سفر کې له امنیتي او دفاعي چارواکو سره په لیدنه کې ویلي، چې دی په هلمند کې د خلکو او امنیتي دفاعي ځواکونو تر منځ د همغږۍ او باور فضار رامنځته کولو ستاینه کوي. په پیل کې د ملي دفاع وزارت لوی درستیز جنرال محمد شریف یفتلي او د ۲۱۵ میوند قول اردو قومندان جنرال عبدالهادي ترین ولسمشر ته د هلمند ولایت د امنیتي وضعیت په اړه راپور وړاندې کړ او امنیتي او دفاعي ځواکونو ته یې د ولسمشر له ځانګړې پاملرنې مننه وکړه. ولسمشر غني په هلمند ولایت کې د ولسي جرګې په ټاکنو کې د امنیتي او دفاعي ځواکونو د غوره مدیریت قدرداني وکړه. هغه د هلمند په قول اردو کې په راغلو تغییراتو خوښي څرګنده کړه او په قول اردوګانو کې یې د منسوبینو په ښوونې او روزنې او ظرفیت لوړولو ټینګار وکړ. غني د خلکو او امنیتي او دفاعي ځواکونو تر منځ د باور جوړولو تجربه چې د دغه ولایت په امنیت کې د مثبت بدلون لامل شوې، وستایله او زیاته یې کړه له دغې تجربې څخه دې په ټولو ولایتونو کې ګټه واخیستل شي.