د ټاکنيزو شکايتونو خپلواک کمېسيون وايي، هغه رايې چې له بايومېټريک پرته کارول شوې، باطليږي.
د ټاکنيزو شکايتونو کمېسيون د يوې خبرپاڼې په خپرولو سره ويلي، د تورو او سپينو رايو د بېلولو لپاره يې اووه ګوني معيارونه ټاکلي چې پر بنسټ به يې عمل کېږي.
د خبرپاڼې په يوه برخه کې راغلي: «په صندقونو کې اچول شوې هغه رايې چې له بايومېټريک پرته د رايه ورکوونکو د نوملړ له مخې کارول شوې، بې اعتباره کېږي.
د ولسي جرګې په تېرو ټاکنو کې ګڼې تخنيکي ستونزې او نيمګړتياوې وې چې تر ټولو لويه هغه يې د بايومېټريک دستګاوو خرابوالی و. د ټاکنو خپلواک کمېسيون ددې ستونزې د هواري لپاره اعلان وکړ، په هغو مرکزونو کې چې بايومېټريک دستګاوې خرابې دي، رايه ورکوونکي له بايومېټريک پرته د نوملړ له مخې هم رايې کارولی شي.
خو د ټاکنيزو شکايتونو کمېسيون اوس د ټاکنو د خپلواک کمېسيون دا پرېکړه رد کړې او وايي چې له بايومېټريک پرته کارول شوې ټولې رايې به باطلې کړي.
د ټاکنيزو شکايتونو کمېسيون له لوري په خپره شوې خبرپاڼه کې راغلي: «کمېسيون دا پرېکړه د شکايتونو د شمېر، شدت او وضعيت تر ارزونې، سلا مشورو او فکر وروسته کړې ده».
تر دې وړاندې ځينو سياسي ګوندونو او جريانونو د هغو ټاکنيزو مرکزونو د رايو د باطلېدو غوښتنه کړې وه چې له بايومېټريک پرته کارول شوې وي.
