محسن داوړ: د بنو جلسه پوځ ته غاښ ماتوونکی ځواب و

د پښتون ژغورنې غورځنګ وايي د بنو جلسه پوځ ته غاښ ماتوونکی ځواب و. ددغه تحریک یو تن مشر محسن دواړ وايي دوی په خپلو سوله ییزو غونډو او لاریونونو نړیوالو ته وښوده، چې غواړي خپل حقوق له ډېرو مدني لارو ترلاسه کړي خو د پاکستان پوځ او حکومت لا هم ددوی غوښتنې نه مني. داوړ ویلي چې وروستۍ غونډه د پاکستان پوځ ته یو غاښ ماتوونکی ځواب وو او خلکو دا ثابته کړه، چې دوی د خپلو حقوقو لپاره خپل غږ اوچتولی شي. تر دې وړاندې د پاکستان د پوځ ویاند ویلي وو، چې منظور پښتین او د پښتونژغورنې غورځنګ په هېڅ صورت نه شي کولی له دې وروسته غونډې او جلسې جوړې کړي. خو یاد غورځنګ پرون په بڼو کې د سیمې په کچه بې ساري او لویه غونډه کړې وه چې زرګونه پښتنو ځوانانو او مېرمنو پکې ګډون کړی و. دوی ټینګار کاوه، چې پاکستانی حکومت دې د پښتنو پر وړاندې توپيري چلند ودروي او ددغه ستر ټبر ټول مدني حقوق دې پر ځای کړي.