ډان ورځپاڼه: ملا برادر د خليلزاد په شخصي غوښتنه خوشی شو

د طالبانو پخوانی چارواکی ملا برادر د زلمي خلیلزاد په شخصي غوښتنه خوشی شوی دی. ډان ورځپاڼې ته د امریکا په بهرنیو چارو وزارت کې باوري سرچینو ویلي چې نه یوازې طالبان د ملا برادر د خوشي کولو غوښتونکي وو، بلکې زلمي خلیلزاد هم په شخصي توګه د هغه پر خوشي کولو ټینګار کاوه. سرچینې ویلي چې افغانستان، پاکستان او قطر ته د زلمي خلیلزاد د سفر په پایله کې ملا برادر خوشی شوی دی. دغه سرچینې ویلي چې خلیلزاد د پاکستان پر حکومت له دې امله ډېر تاکید کړی دی چې ملا برادر به د سولې د خبرو د چټکتیا او پرمختګ لپاره خوشی کوي. پاکستاني حکومت د افغان حکومت له پرله پسې غوښتنو سره سره ملا برادر نه خوشی کاوه، خو د امریکا په غوښتنه یې نوموړی له بند خوشی کړی دی. ملا برادر د طالبانو د پخواني مشر ملا محمد عمر مرستیال و چې د طالبانو په لیکو کې له خورا ډېر نفوذ برخمن و. هغه دمګړی د پاکستاني پوځ له زندان خوشی شوی دی او په اسلام اباد کې تر درملنې لاندې دی.