يو کمربند او يوه لار؛ د چین او افغانستان په ګټه يوه پروژه ده

داطلاعاتو او کلتور وزارت دفرهنګ او هنر د معين پوهاند محمد رسول باوري په ګډون نن دافغانستان او چين د تاريخي اړيکو او د يوکمربند او يوې لارې په پروژه کې د هغو دارزښت علمي او څيړنيز سييمينار جوړ شو.
دغه سيمينار داطلاعاتو اوفرهنګ وزارت له خوا د يو شمير دولتي مسوولينو، د پوهنتونونو د استادانو، د علومو اکاډمۍ د څيړونکو، فرهنګي شخصيتونو او دچين هېواد د څيړونکو په ګډون جوړ شوی و.
ددغه سيمينار په پيل کې د اطلاعاتو او فرهنګ وزارت د فرهنګ او هنر معين د يوه کمربند او يوې لارې د پروژې په باب چې دچين هېواد له لوري طرحه شوې ده خبرې وکړې او دوريښمو د لارې د ارزښت او په هغې کې د افغانستان د رول په اړه یې معلومات ورکړل .
پوهاند باوري څرګنده کړه چې په تيرو زمانو کې افغانستان د نړۍ د فرهنګونو د تقاطع د مرکز په توګه و او اوس غواړم چې افغانستان بيا خپل دغه دريځ پيداکړي او ختيځ له لويديځ او شمال له جنوب سره ونښلوي .
دغه راز دچين هېواد دشانګهاي دسيمه ئيزو مطالعاتو دمرکز رييس د افغانستان اوچين ترمنځ د دوستانه اوتاريخي اړيکو د وريښمو د لارې او د يوه کمربند او يوې لارې د پروژې په اړوند معلومات ورکړل او ويې ويل چې دغه پروژه د سيمې او د اسيا د هېوادونو د اړيکو او اقتصاد د لاښه والي په خاطر ارزښتناکه ده .
ده څرګنده کړه چې د يوه کمربند او يوې لارې پروژه يوه ازاده ، عادلانه او د دواړو لورو په ګټه پروژه ده اوهيله يې څرګنده کړه چې دغه پروژه د دواړو هېوادونو ترمنځ دهمکارۍ زياتې زمينې برابرې کړي .
دغه راز يوه بل چينيايي څيړونکي په خپلو خبرو کې له افغانستان سره د چين د همکاريو په اړوند معلومات ورکړل او د عينکو د مسو دکان د پروژې يادونه یې وکړه او ويې ويل چې چين به د يو کمربند او يوې لارې په پروژه کې هم افغانستان هير نه کړي.
په دې سيمينار کې سرڅيړونکي کتاب خان فيضي د وريښمو د لارې په تګلاره کې د کاروان سرايونو او د سياسي مراسلاتو د ليږدونې په اړوند معلومات ورکړل.
داطلاعاتو او فرهنګ وزارت حقوقي سلاکار دلاور نذيرزوي ددې سيمينار په پاى کې د دې تر څنګ چې د سيمينار کار یې جمع بندي کړ څرګنده کړه ،دې ته اړتيا ده چې د يوه کمربنداو يوې لارې د پروژې په اړوند بحثونه زيات دوام ومومي .
ده زياته کړه چې افغانستان د سيمې د هېوادونو سوداګريز او اقتصادي د هليز او څلور لارى دى او د يوه کمربند او يوې لارې په پروژه کې ددغه هېواد په پام کې نه نيول به تيروتنه وي .