پښتون ژغورنې غورځنګ يا پي ټي اېم وړمه ورځ د پښتونخوا په تاریخي ښارګوټي «بنو» کې ولسي غونډه درلوده چې لسګونو زرو کسانو پکې ګډون کړی و.
د بنو په غونډه کې د سوېلي او شمالي وزیرستانونو په شمول د کوټې، پېښور، ملاکنډ او پښتونخوا د بېلابېلو برخو اوسېدونکو ګډون کړی و.
د پښتون ژغورنې غورځنګ فعالان وايي، د بنو د غونډې لپاره يې دېرش زره څوکۍ راغوښتې وې، خو د څوکيو د دوه برابره په شمېر خلکو په غونډه کې ګډون کړی و.
بي بي سي د ازاد خبریال عمر درزا وزیر له قوله ويلي چې په بنو کې د پي ټي ايم په غونډه کې لږ تر لږه ۶۰ زرو کسانو ګډون کړی و.
د بنو په غونډه کې د پي ټي اېم د نورو غونډو په څېر د تری تم شویو کسانو د کورنیو غړیو، ماشومانو، ښځو او سپين ږیرو هم ګډون درلود.
په ياده غونډه کې د پښتون ژغورنې غورځنګ سپين ږیري غړي فیض محمد کاکا هم ګډون درلود. اته اتیا کلن دا سپين ږيری په صوابۍ کې د غورځنګ تر ولسي غونډې وروسته پاکستانيو پولیسو نیولی و، چې پر خواله رسنیو يې د “زولنو عکسونه” لاس په لاس شوي و.
پښتون سیاستوال او د عوامي نېشنل ګوند افراسیاب خټک د بنو ولسي غونډه تاریخي یادوي او وايي چې یادې سیمې تل د پښتنو د غورځنګونو ملاتړ کړی دی: «که څه هم د یاد غورځنګ پېل له وزیرستانه شوی، خو وړانګې يې اوس تر کوټې، پېښور او ملاکنډه رسېدلې دي او دا اوس یو تاریخي غورځنګ دی».
د پي ټي ايم مشر منظور پښتين د بنو غونډې ته په وينا کې وویل چې د پښتنو د حقوقو د ترلاسه کولو تر وخته به خپلې مبارزې ته دوام ورکوي.
د غورځنګ يوه بل فعال او د پاکستان د پارلمان غړي محسن داوړ ويلي چې مبارزې يې لويې لاسته راوړنې درلودلې دي او تر ټولو لويه لاسته راوړنه یې دا ده چې پښتنو ته يې د خپلو حقونو د ترلاسه کولو جرئت ورکړی دی. داوړ وايي، د دوی د مبارزې پايله ده چې اوس هر پښتون ځان پښتين، داوړ او علي وزير بولي.
د پښتون ژغورنې غورځنګ د بنو غونډې ته د تېر په څېر يو ځل بيا هم رسنيو پوښښ ورنه کړ، خو د تېر پر خلاف دا ځل هلته ټليفوني او انټرنيټي خدمتونه هم ځنډول شوي وو.
په دې وروستیو کې فکر کېده چې د پښتون ژغورنې غورځنګ کمزوری شوی، خو د بنو غونډې يې ثابته کړه چې د پښتين اواز لا هم اوچت دی او په پښتونخوا او قبايلي سيمو کې په لسګونو زره ملاتړي لري.
