د طالبانو پخوانی چارواکی ملا برادر په پاکستان کې له نهه کاله بنده د زلمي خلیلزاد په شخصي غوښتنه خوشې شوی دی.
پاکستانۍ ډان ورځپاڼې ته د امریکا په بهرنیو چارو وزارت کې باوري سرچینو ویلي چې د ملا برادر د خوشې کېدو غوښتنه نه يوازې طالبانو کوله، بلکې زلمي خلیلزاد هم په شخصي توګه د هغه پر خوشې کېدو ټینګار کاوه.
سرچینې ویلي چې افغانستان، پاکستان او قطر ته د زلمي خلیلزاد د سفر په پایله کې ملا برادر خوشې شوی دی.
دې سرچینې ویلي چې خلیلزاد د پاکستان پر حکومت ډېر ټينګار کړی، څو ملا برادر د افغان سولې د خبرو د چټکتیا او پرمختګ لپاره خوشې کړي.
پاکستاني حکومت د افغان حکومت له پرله پسې غوښتنو سره سره ملا برادر نه خوشې کاوه، خو د امریکا په غوښتنه یې نوموړی له بنده خوشې کړی دی.
ملا برادر د طالبانو د پخواني مشر ملا محمد عمر مرستیال و چې د طالبانو په لیکو کې له خورا ډېر نفوذه برخمن و.
هغه دمګړۍ د پاکستاني پوځ له زندانه خوشې شوی او په اسلام اباد کې تر درملنې لاندې دی.
په کابل کې د اسلام اباد سفارت وړمه ورځ د نوموړي خوشې کېدل تاييد کړل.
