ولسمشر غني وړمه شپه په ارګ کې په یوه فرهنګي غونډه کې ویلي چې شل کاله وړاندې په افغانستان کې لس کسان نه پیدا کېدل چې په پښتو او دري ژبه لیکل وکړي. ولسمشر تر دې وړاندې له یوې بهرنۍ رسنۍ سره په مرکه کې ورته څرګندونې کړې وې. د ولسمشر غني دا څرګندونې په افغانستان کې د لیکوالو او فرهنګیانو له توند غبرګون سره مخ شوي او وايي چې ولسمشر بیا بیا په خپلو دغو خبرو سره د افغانستان فرهنګیانو، لیکوالو او آن افغان ولس ته سپکاوی کوي.
د ولسمشر خبرې ښيي چې هغه نه یوازې د افغانستان له فرهنګ څخه ناخبره دی، بلکې په دې هم نه پوهېږي چې شل کاله وړاندې په افغانستان کې داسې عالمان اوسېدل چې د ځینو ژوندیو یې اوس هېڅ سیال نشته او د وفات شوو ځای یې لا هم تش دی چې په تېرو شلو کلونو کې د هغوی په سویه عالمان پیدا نه شول. شل کاله وړاندې چې محمد اشرف غني له امریکا کابل ته راغی، په کابل کې د علامه عبدالشکور رشاد، سرمحقق عبدالله بختاني خدمتګار، استاد حبیب الله رفیع او ګڼو نورو فرهنګیانو او لیکوالانو په شان ستر لیکوالان او فرهنګیان وو چې نه یې بدیل پیدا شو او نه یې هم چا تر اوسه تشه ډکه کړې ده.
ولسمشر هڅه کوي چې په هر څه کې خبرې وکړي او معلومات ورکړي، له همدې امله پرله پسې نه یوازې تېروتنې کوي، بلکې ځان مسخره کوي او آن کله کله ځینو خلکو ته سپکاوی هم کوي. نوموړی ډېری وختونه په اسلامي مسایلو کې خبرې کوي، چې بیا لویې او نه جبرانېدونکې تېروتنې وکړي. کله بیا په ادبیاتو او فرهنګ خبرې کوي، خو که څوک یې خبرې او متن لوستل ګوري، نو سړی فکر کوي چې ښايي پښتو او دري یې مورنۍ ژبې نه وي او یا یې هم دا ژبې نوې او نیمګړې زده کړې وي. هغه نه یوازې ښې خبرې نه شي کولی، بلکې آن لیکلی متن هم نه شي لوستلی. بیا چې کله خبره شعر او شاعرۍ ته ولاړ شي، نو داسې تېروتنې وکړي چې د طنزي پروګرامونو او خندا لپاره مواد برابر شي.
انسان نیمګړتیاوې لري او هېڅ انسان په هره برخه کې پوره نه دی او نه هم له چا دا تمه وي، خو ولسمشر هڅه کوي ځان په هر څه کې پوره وښيي. ستونزه یوازې دا نه ده چې هغه تېروتنه کوي، بلکې ستونزه دا ده چې ځینې خبرې یې د زغم وړ نه دي. د نوموړي وروستۍ خبرې سلګونو او زرګونو فرهنګیانو او آن سلګونو زرو هغو کسانو ته سپکاوی دی چې شل کاله وړاندې په افغانستان کې اوسېدل، پښتو او دري لیکل یې کولی شول او په سختو شرایطو کې اروپا او امریکا ته ونه تښتېدل، بلکې همدلته د خپل ولس په څنګ کې پاتې شول، خپلې ژبې او فرهنګ ته یې خدمتونه وکړل.
د ولسمشر فرهنګي سلاکاران او شاوخوا کسان دې نوموړي ته ووايي چې نور دا سپکاوی بند کړي. خلک که ترې دې کار تمه نه لري او نه یې ور رسوي، نو لږ تر لږه دا مهرباني دې وکړي چې نور خلکو ته دا ډول توهین ونه کړي. محمد اشرف غني باید پوه شي چې ولسمشر دی او د یو ولسمشر په حیث دې له بې مسوولیته او له سپکاوي ډکو خبرو څخه ځان وساتي. هغه ته پکار ده چې د یو ولسمشر په توګه خبرې او چلند وکړي او خپل ولس ته درناوی ولري.
